打比郡養尊處優咬海鷗

猪拉多纳

白禮頓入附加賽筋疲力盡

英冠升班附加賽正式開打，首先登場嘅有位列第6嘅白禮頓主場迎戰近期氣勢如虹嘅「3哥」打比郡，白禮頓喺英冠最後一輪搏盡贏波，奇迹壓過雷丁攞到升班附加賽資格，相反打比郡養尊處優，留力搏殺呢場大戰，今場受讓平半，下盤值得捧場。

（TVB 301周五凌晨2時45分直播）

「海鷗」白禮頓同雷丁喺爭逐附加賽最後一席位鬥得燦爛，一直留守第6位嘅雷丁季尾狀態飄忽，相反白禮頓季尾發力，喺收咧戰更戲劇性贏波，作客諾定咸森林輸緊1球下反勝2比1，嗰球仲要係臨完場補時階段先入，成功以1分力壓同日和波嘅雷丁。「海鷗」呢場勝仗無疑令班波士氣大振，但就嚴重消耗體力，今場主場出戰都不宜高估。
韋曉士穿針引線有料到

「綿羊」打比郡嚟到季尾一啲都唔好蝦，仲要係好惡嗰種，喺4月取得全勝佳績，上場作客打和列斯聯皆因呢隻「綿羊」懂得收放之道，前中後均有主力避戰，包括前鋒基斯馬田、中場白賴臣及中堅積基布頓，若然睇小呢隻養尊處優嘅「綿羊」，就會隨時畀佢反咬一啖。加上打比郡陣中有位科娜幾睇好嘅球員，佢就係中場韋曉士，呢位只得19歲嘅英格蘭小將踢法一啲都唔似得19歲，表現非常成熟，亦充滿足球智慧，合作性好高，經常餵靚波畀隊友，喺韋曉士3月受傷期間，「綿羊」冇咗佢就好似失去方向，所以嗰陣打比郡經常失分，但喺佢傷愈復出後，佢係其中一位幫球隊重上正軌嘅功臣，有佢再加上陣中兩大「士哥拿」基斯馬田同白賴臣，打比郡下盤捧得過﹗