水手叉足電主W捕「鳥」

猪拉多纳

橫濱水手今日主場迎戰鳥棲砂岩，唔只係前日職一哥對現任一哥嘅面子之戰，仲係水手前鋒齋藤學同鳥棲射手豐田陽平爭入日本世盃大軍名單嘅最後較量，呢啲唔衰得嘅對碰，都係博水手1.95倍主W着數啲，事關佢哋主場往績贏晒！

（有線61及201周六下午1:00直播）

日本國家隊下星期一就公布世盃名單，齋藤學、豐田陽平兩個公認係前鋒入面，直接競爭嘅一Pair。由聯賽入球數字去講，豐田完全K.O.齋藤，數據係7球對1球，但係有「日本美斯」之稱嘅齋藤潛質優厚，連啲德國球會都睇中佢，所以入選呼聲反而高過豐田些少，於是乎今日佢兩個嘅表現，就被視為邊個能夠入選嘅決定性關鍵。
齋藤學爭踢世盃必搏

因為亞冠盃、日職雙線作戰，水手季初表現起伏好大，但係亞冠出局之後，佢哋一身鬆晒，周初仲放咗兩日假充電。唔只咁呀，水手早兩日仲宣布引入adidas嘅micoach技術，同呢種最新款嘅無綁帶心率探測器，用嚟幫齋藤學呢啲主力，收集訓練數據提升表現，由呢件事睇到水手已經收拾心情專攻聯賽。由於佢哋歷史上7戰鳥棲攞到6勝1負，主場仲4戰全勝，今日都係博佢哋贏合理啲。