利華衝歐聯席位「來」勢洶洶

猪拉多纳

德甲冠軍碟雖一早畀拜仁捧走，但嚟到最後一輪仲有幾隊要為下屆歐聯席位作最後衝刺，好似排第4嘅利華古遜，除咗希望取代史浩克04個第3位，直接躋身歐聯分組賽外，亦驚畀禾夫斯堡同慕遜加柏從後追上，所以今晚主場對住高不成低不就嘅雲達不來梅，實行開行火力，讓一球下博1.57倍「讓主」。

（有線62及202、廣東體育周六晚9:30直播）

「利華」歇冬後成績江河日下，直接導致希比亞上月初慘食無情雞，而由沙斯查利雲度夫斯基接任做暫代教頭後，成班波又即刻生番晒，4場聯賽攞到3勝1和不敗，果然有啲料到！以呢班波近4場聯賽攻入10球嘅強大火力，要喺主場謝幕戰入多幾球應唔係難事！
不來梅踢風流波

儘管沙斯查利雲度夫斯基帶隊成績突出，但「利華」已經扑錘下季搵薩爾斯堡主帥舒密特過嚟接手，前者之後就會做番青年軍教練，當中由佢提拔嘅20歲新星安利簡恩自奪得正選位後愈戰愈勇，賽前仲講明要踢番場好波報答恩師，今場肯定有殺無賠！

另邊廂嘅雲達不來梅，依家排喺聯賽12位，可以話大踢風流波，從對上兩場作客分別畀緬恩斯同拜仁慕尼黑大炒，連向主場球迷交代嘅動力都冇埋，睇嚟「不來梅」今場都幾難同目標鮮明嘅「利華」抗衡，最後一場隨時要被大炒先至收咧。
頂占筍盤：利華古遜（主勝）