曼城 但求扑錘 輸盤話之佢

猪拉多纳

英超冠軍獎盃應該已經送到曼徹斯特，曼城領先次席利物浦兩分，兼多13粒淨得球，今晚主場只要贏甚至打和「錘仔幫」韋斯咸，即可重奪失落一季嘅冠軍。球員心情既興奮又緊張，演出反而或會綁手綁腳，尤其係兩年前煞科戰幾乎陰溝裏翻船，相信曼城會行穩陣路線，希望無驚無險過終點，預料小勝居多，讓球主客和「-2」，隨時贏波輸盤，入球大細中位數調高至3.5球，博細盤。（now 621周日晚10時直播）

穩字行頭贏夠就算

利物浦上仗領先3球下被水晶宮逼和，曼城正好引以為鑑，爭取入波之餘，亦要做好防務，否則所有努力隨時付諸流水。領隊比歷連尼當然深明來到爭標最後時刻，唔需要理踢得好唔好睇，最緊要攞3分捧盃。

值得一提，曼城兩年前煞科戰，只要贏昆士柏流浪即可捧盃，但竟然踢到補時先至驚險反勝。比帥作風比前任主帥文仙尼穩陣，相信唔會令歷史重演，預料會踢得較保守，入波後即加強防守，力保勝果。

韋斯咸已護級成功，戰意肯定唔及曼城，唔會放軟手腳，尤其係今場可影響冠軍誰屬，更加想趁機「搞事」留名。「錘仔幫」要攻破曼城好困難，但佢哋防守唔錯，今季18場聯賽作客僅失23球，比利物浦、曼城、阿仙奴同熱刺仲少。由於領隊艾拿戴斯帥位不穩，今仗去到曼城球場，即使贏唔到，亦唔希望輸得太肉酸，否則隨時飯碗不保，一於「泊大巴」喺龍門前，留難一下曼城。