切爾達大膽狙擊皇馬

猪拉多纳

安歷基回巢巴塞考牌戰

今季西甲鬥到轉彎入直路，形勢峰迴路轉，盛傳即將入主巴塞嘅切爾達教頭安歷基，今晚聯賽帶領切爾達主場迎戰皇馬，被視為安帥考牌試，加埋前巴塞青訓產品洛尼圖腳風勁順，兩師徒一定幫母會狙擊「銀河艦隊」，皇馬王牌加里夫巴利據報出得，鬥攻格局必多士哥，大細中位數調至3.5球照捧大盤。（now 634及661周一凌晨1時直播）

巴塞主帥馬天奴離隊幾成定局，究竟會由邊位接任呢？上周西班牙傳媒影到體育總監蘇比沙列特密會切爾達教頭安歷基，令後者成為大熱人選，一來安歷基係「地上最強」具威望嘅名宿，二來佢執教生涯第一站正係巴塞B隊，熟晒內部運作，大佬沙維、美斯、恩尼斯達個個都服佢，高層亦希望尋找另一名好似哥迪奧拿般自家製嘅成功教頭，有巴塞DNA嘅安歷基可謂眾望所歸。

據報蘇比沙列特仲向安歷基落咗第一個柯打，就係今晚幫手狙擊皇馬，令巴塞喺爭標路上掃除一大勁敵，因此今場絕對係安帥嘅考牌戰。切爾達能夠提早上岸，多得頻有士哥嘅前鋒洛尼圖，呢位前巴塞青訓產品近四仗狂轟七粒，腳風順到冇朋友，撞正皇馬中堅比比肌肉撕裂要抖15日，洛尼圖等前鋒隨時有餐開。
巴利仔趕及復出搏殺

皇馬連續兩場和波失分，落後馬體會同巴塞4分及1分，爭標形勢唔多樂觀，但「銀河艦隊」上下表明唔會放棄，一定盡力爭勝，雖然C朗肯定倦勤，但上仗缺陣嘅加里夫巴利傷勢冇乜大礙，好大機會喺今仗復出掛帥，事實皇馬已經冇失分空間，必定豁出去搶攻，加上近四仗入五粒嘅「帶刀侍衞」沙治奧拉莫斯着晒火，鬥攻下實多波入，就算大細中位數調至3.5球都冇有怕，照捧入球大。