馬體會-1熱爆衝冠

猪拉多纳

渡邊年幾個星期前講過馬體會啲波成日冇得睇，有關方面果然從善如流，近周都有得播，仲畀大家見證住佢哋上輪點樣喺利雲特身上全失三分。不過大家唔使因為呢場波而嚇窒，今晚馬體會主場鬥馬拉加，雖然賽前有消息指迪亞高哥斯達大腿肌肉拉傷或缺陣，但馬體會一向踢整體，就算冇咗「迪哥」，韋拿一樣擔得起隊波，照捧熱爆嘅讓球主勝。（now 635周一凌晨1時直播）

上仗馬體會輸波，唔多唔少因為個七分鐘烏龍波輸壞咗，加上球隊搏完歐聯都有啲攰，回氣之下爆冷輸畀利雲特，實屬正常軌迹。嚟到爭標最後兩場，依家佢哋畀巴塞追到氣咳，雙方只差三分，下周煞科戰兩軍仲要正面對撼，馬體會首循環主場同巴塞互交白卷，由於西甲同分計對賽成績，下場差唔多變成一場過嘅決賽咁滯，其實馬體會今場無論任何戰果，下場贏巴塞都攞到冠軍，但去到最後關頭，唔計得咁盡，而且冇理由輸波打擊自己士氣，梗係贏埋呢場最好啦。
冇「迪哥」照有人識入波

雖然賽前有消息指迪亞高哥斯達可能缺陣，但馬體會陣中不乏進攻好手，韋拿、魯爾加西亞同佐治高基都可以入波，而今仗對手馬拉加離護級區有5分，原則上好安全，唔需要同馬體會搏命，馬體會教練施蒙尼亦唔係鍾意「揸流攤」嘅人，一定叫球員盡力爭取勝利，讓球主勝雖得1.57倍，但仍屬穩陣之選。