哥斯達傷愈馬體會鬥志可「加」

猪拉多纳

西甲爭標形勢非常激烈，今晚「一哥」馬德里體育會主場迎戰馬拉加，為免煞科戰對巴塞隆拿陷入不利局面，呢場3分實在不容有失，幸好右腳肌肉受傷嘅王牌前鋒迪亞高哥斯達尋日通過體測，今場有望上陣，而且馬體會主場向來有保證，1.57倍「讓主」抵博！（now635台周一凌晨1:00直播）
馬拉加遇三甲全敗

馬體會依家領先巴塞3分排榜首，但佢哋最後一場要作客魯營，令爭標形勢充滿變數，今仗如果有乜差池，煞科戰嘅壓力將會激增。西媒爆料，迪亞高哥斯達腳傷傷愈，尋日亦有參加操練，成隊波只得基斯甸洛迪古斯一名傷兵，以及停賽嘅高甸唔踢得。事實上馬體會近2個月要兼顧聯賽、歐聯，每3、4日就要比賽，上場作客利雲特踢起上嚟真係顯得有心無力，落敗情有可原，不過今次球隊有8日時間畀教頭施蒙尼作出調整，球員有足夠時間回氣，有助踢回水準。
C朗難鬥切爾達

何況賽前皇馬證實C朗唔出得，作客切爾達未必啅硬，更激起馬體會爭標雄心。

另邊廂嘅馬拉加暫列13位，護級壓力唔大，但呢班波今季有個壞習慣，就係遇強即屈，近5次對聯賽頭三甲球隊全敗兼一球不入，今晚作客對住3分志在必得嘅馬體會，睇怕都難逃大敗。
馬體會贏親皇馬玩完

1. 若馬體會今場贏波，皇馬肯定無緣爭冠。

2. 排名先計對賽成績再計得失球差（不考慮作客入球），意味住若馬體會最後同巴塞同分，極可能被巴塞以得球差壓倒奪冠。

3. 馬體會拎多4分就肯定捧盃，即係話今輪若贏波，最後一輪對巴塞和波亦可奪冠。

4. 馬體會今輪若輸波而巴塞獲勝，必須喺兩軍最後一輪對賽贏波先可奪冠。