睇波互相抽水冇壞o架

猪拉多纳

曼聯球迷、利物浦擁躉，永遠勢成水火？巴塞、皇馬粉絲一定冇朋友做？我覺得未必喎！其實敵對球迷一樣可以傾波經、做朋友，不過講真吖，有時睇波，大家鬥吓牙骹，互相寸一番都好過癮，最重要係記住：水可以抽，但要適可而止。
喜歡足球已係老友

今季英超曲終人散，曼聯沉淪、利記失冠成焦點，「鍵盤戰士」網上抽水百花齊放，其實佢哋幾有創意，「莫耶斯係足球天才」、「謝拉特一失足成千古恨」等等，無論改圖改字，睇完亦會心微笑。

小弟覺得，寸人嘅，要留有餘地；被寸嘅，一笑置之，大家就可相安無事，風水輪流轉嘛，下次可能互換角色呢！不過部分人鍾意用「獌、猁、鏝」等字眼去貶低甚至侮辱對方，我就覺得咁樣人身攻擊似乎過晒火。識得有對夫妻，一個捧「紅魔」、一個撐「紅軍」，每逢「雙紅會」實勢不兩立，但比賽過後，咪一樣咁恩愛，唔通為咗支持愛隊，搞到要離婚收場咩？
捧埋世仇爆頭

除咗對人態度，亦要檢討自己，有啲死硬派勝利球迷，成日輸打贏要，一失利就怨冇運、賴黑哨，藉口層出不窮，對方贏就實係符碌、球證偏幫。理性啲啦，自己支持嗰隊踢得曳就要鬧，就要接受，如果人哋踢得好，唔係叫你要認低威讚佢，但起碼尊重對方。

好多人已經盲目到世界盡頭，早排愛華頓對曼城場爭標關鍵戰，「利迷」居然撐「拖肥糖」，「曼聯躉」就「離奇」捧「藍月亮」，你話幾矛盾！講到尾，無論你捧利曼皇巴，大家都喜歡足球，已經係老友啦！