歐霸決戰賓菲加發「維」

猪拉多纳

告別悲情爭做4冠王！

西甲勁旅西維爾同葡超冠軍賓菲加今晚會喺都靈爭歐霸盃，賓菲加上季做咗悲情「三亞王」，今季呢班波一吐烏氣，家陣已經有兩個錦標喺手，仲有機會挑戰「四冠王」頭銜添！無論實力、狀態同經驗，賓菲加都贏西維爾幾條街，賓菲加只係小讓平半，捧1.94倍上盤！

（有線61、64、201及203、廣東體育周四凌晨2:45直播）

阿占翻查歷史，先知原來喺1957至58球季嘅歐冠盃外圍賽，西維爾曾兩回合計以3:1淘汰賓菲加，兩軍時隔57年再次喺歐戰相遇，不過今時唔同往日，賓菲加已經連續第2年殺入歐霸決賽，上屆雖以1:2輸畀車路士屈居亞軍，但深受球員歡迎嘅教練佐治捷西斯，喺吸取上屆「三亞王」嘅慘痛經驗後，今季已經脫胎換骨，家陣已連奪葡超及葡聯盃冠軍，仲殺入歐霸及葡萄牙盃決賽，要成就4冠王霸業，絕對唔係夢想！
卡度素歐霸75戰入34球

查實喺4強淘汰祖雲達斯一戰，已經完全「騷」到賓菲加嘅強大力量，首回合先喺主場用銳利反擊殺退祖記，次回合就靠死守闖入決賽，堅係攻又得守又得！雖然賓菲加翼鋒拿沙馬高域為停賽上訴未知結果，但有洛迪高利馬、洛迪高摩連奴同奧斯華度加坦在陣，入波唔係問題，唔好忘記仲有「歐霸專家」奧斯卡卡度素在陣，呢位巴拉圭前鋒已經踢過75場歐霸，勁入34球，邊使擔心鋒力唔夠呀！唔怪得曾經効力兩支決賽球隊嘅馬真拿，都覺得賓菲加較有優勢啦。
西維爾符碌晉級

之前都講過，賓菲加有5個球員踢過西甲，包括加雷同伊度亞度沙維奧，佢哋對西維爾應該唔會陌生！尤其係西維爾近期狀態麻麻，而且晉級過程相當符碌，自16強開始都係贏一場輸一場咁，表現冇乜說服力，最大鑊係佢哋件中場主力維度路因傷未必踢，嚟到今晚終極決戰，小弟都係撐賓菲加好啲！
頂占筍盤：賓菲加（上盤）