馬拉加Hea踢 益利雲特

猪拉多纳

今晚西甲有場獨腳戲，由馬拉加主場對利雲特。當大家都將注意力集中喺爭標組同護級組嘅同時，西甲中游球隊其實都唔係等緊放暑假，好似利雲特咁就想力壓同市球隊華倫西亞做巴倫西亞市「一哥」，今晚作客馬拉加肯定唔會Hea踢，阿King捧讓球客勝。

(周六凌晨3時開賽)
爭做巴倫西亞一哥

利雲特同華倫西亞一向係巴倫西亞市死敵，華倫早年戰績甚佳，令利雲特一直活喺其陰影下。不過時移世易，華倫西亞今季戰績平平，反而利雲特卻表現不錯，早前更曾爆冷贏過榜首球隊馬德里體育會，現時喺積分榜以兩分壓住華倫西亞，今仗贏波即能自2010年重返西甲後首度成為巴倫西亞市「一哥」，相信球員今仗唔會錫力，人人非常拚搏。

馬拉加現時排喺第13，基本上已護級成功，球隊近期主場戰績唔算突出，上次竟不敵艾爾切表現令人失望。馬拉加德國籍主帥舒斯達下季會否繼續領軍仍屬未知數，球員心態上隨時已提早放暑假，Hea踢之下，今仗難阻爭勝心較強嘅利雲特。
比勒費爾德受讓有計

其餘賽事方面，德乙比勒費爾德季尾表現有明顯改善，護級鬥心強，今仗對手只係德丙嘅達斯泰特，比勒費爾德仲有得受讓值得支持。

阿甲方面，男生隊已篤定降班，主場最後一戰都想贏波謝幕，但近況平平恐有心無力；貝格拉諾則無欲無求，相信唔會搏命，球隊已連開7口半場和，值得再追。