聖莊士東處女決賽搏甩髀

猪拉多纳

上周蘇超煞科，今晚就假格拉斯哥些路迪公園球場舉行蘇足盃巔峰對決，由聖莊士東火併登地聯上演泰賽德打吡，雖然計牌面登地聯略勝一籌，但今次係聖莊士東歷史上首度殺入蘇足盃決賽，爭冠欲望更加強烈，況且近年交手不落下風，仲有得受讓，梗係捧讓球主勝喇。

（周六晚10時開賽）
往績食住登地聯

登地聯坐擁杜爾、萊茵格特、史超活岩士唐等90後蘇格蘭復興希望之星，及腳風甚順嘅土耳其前鋒施夫斯，若果逐個秤略勝聖莊士東，但足球唔係咁簡單。聖莊士東係著名蘇超升降機，其主要死敵係登地及登地聯，仇人見面分外眼紅，每次上演泰賽德打吡都特別激烈，聖軍自創會後從未贏過國內重要盃賽錦標，今次更係首度躋身蘇足盃決賽，咁啱遇上死敵登地聯，唔使動員都戰意十足。睇番雙方近六次交鋒，人腳較曳嘅聖莊士東只曾一敗，當中仲贏咗四場添，真係估佢唔到，有點格食格味道，加上聖軍係今季聯賽失球第二少嘅球隊，僅次於冠軍些路迪，防守穩健對於踢一場過嘅決賽場合非常有利，斯維認為聖莊士東有得受讓相當着數，捧讓球主勝。