砂岩勒唔住活捉松鼠

猪拉多纳

今晚連場爭標大戰，締造球季最後高潮，莊家、投X者磨拳擦掌希望收咧前賺番筆，等睇世界盃，投X市場非常暢旺。西甲馬德里市認真威水，如無意外，應該會平分聯賽及歐聯錦標。照目前形勢睇，馬體會偏向重視西甲，皇馬要搶歐聯，因此市場普遍睇好馬體會作客巴塞，可以全身而退捧盃。歐洲波開賽前，先玩日職賽事，重心推介鳥棲砂岩主場對大宮松鼠，主隊讓半一，照捧上盤。

（周六下午2時開賽）

鳥棲砂岩並非傳統勁旅，但勝在開局相當順，近7場聯賽更贏6場。呢類中小型班球隊技術層面上唔係最強，但夠拚勁，靠打道度氣，一旦踢起信心同士氣，往往勒都勒唔住。日職處於上半季，鳥棲砂岩球員心中仍有一團火，未被打殘之前，仲可以追捧。
松鼠自卑可長反

大宮松鼠長年屬於陪跑分子，往往為護級掙扎，一來礙於球會財力有限，未能吸引高質素球員加盟，二來長期積弱亦令球員有自卑感，每逢遇上前列球隊，認定贏唔到，心理質素處於下風，可謂未開波已先輸一半，可以作為長反對象。

另外，德國盃決賽，拜仁慕尼黑太早奪得聯賽冠軍，反而令球員變得鬆懈，甚至可以用洩氣來形容，唔可以再用佢哋最巔峰時期水準衡量，讓多蒙特半一，未免太過火，要下盤。