分秒必爭：輕巧試準開勝門

不死鸟

伍碧權近期成績反彈，贏多兩場便可以上岸，今次馬房兩匹實力馬「大唐勇將」及「百利高」均交由冠軍騎師韋達執韁，肯定會備受追捧。

　　不過，睇番韋達同伍碧權季內合作六次都未入過三甲，而且不少馬匹被熱捧下跑到冇影，投注前宜三思。兩駒之中，「百利高」跑一千米新馬賽，形勢始終較明朗，如非太熱仍可捧場﹔反而「大唐勇將」上仗跑泥地千二米配魯柏軒亦後上如飛，今次增程兼配韋達一定惹人憧憬，但五班泥地一哩向來係爆冷溫床，此駒沒有路程根據支持，騎練亦係盲門組合，若太熱未必值博。

　　若各位想敲冷門，筆者則推介同樣是列陣第四場五班泥地一哩的「輕巧」，日前試泥地千二米閘，早段一直拍住「當旺」搶放，最後走入一席第三，估計今仗極有可能改變跑法，以前領戰略謀求突破。再看「當旺」剛戰已在四班谷戰贏馬，「輕巧」在五班上陣怎計也有着數，距上仗已有三個多月時間，在體力上也佔一定優勢，隨時可打開勝門。