華拉度列搏殺格

猪拉多纳

要留級 贏波先至有價講

今季西甲護級戰可謂非常刺激，除咗冠軍要打到最後一輪先知花落誰家，連華拉度列、奧沙辛拿、CF格蘭納達、基達菲及艾美利亞等下游分子，仍要為搶分護級困獸鬥，其中尾二嘅華拉度列就喺主場與CF格蘭納達正面交鋒，前者必須贏波先有機會逃出生天，挾住近12仗主場不敗氣勢，決心十足之下，誓要擊敗作客曳爆嘅CF格蘭納達，華軍小讓平半值得支持。

（now 632周一凌晨零時直播）

先解釋番日前西甲護級形勢，除咗貝迪斯篤定降班之外，第15嘅艾美利亞至尾二嘅華拉度列只係差3分，即係話華拉度列、奧沙辛拿、CF格蘭納達、基達菲及艾美利亞為咗爭留番喺甲組，喺煞科日仍要鬥生鬥死，華拉度列更要喺主場與勁敵CF格蘭納達交手，真係不成功便成仁。

華拉度列上仗作客意外地臨尾輸畀貝迪斯，現時落後尾四嘅CF格蘭納達兩分，意味住華拉度列今仗非勝不可，CF格蘭納達若然打和，不但可推華軍落火坑，就算尾三奧沙辛拿今輪贏波只能同CF格蘭納達同分，後者亦可憑較佳對賽成績保住尾四位置。
格蘭納達近況曳爆

話雖如此，但CF格蘭納達狀態實在太曳，唔單止近8仗聯賽輸咗6場，之前10場作客亦未嘗一勝，當中仲輸咗8場。仲有主力謝臣梅里路停賽及羅拔圖費南迪斯受傷，實力大削。相反華拉度列主場出擊特別醒神，近12場正式比賽未輸過，曾經贏過巴塞、維拉利爾及逼和皇馬，絕對唔講得笑，雖然佢哋贏波仲要望奧沙辛拿失分先有機會上岸，但去到生死關頭唔諗得咁多，一定拚命贏咗先算，戰意高昂下值得睇高一線，華軍小讓平半有1.82倍，真係有買趁早。