想攞冠軍防守至係王道

猪拉多纳

睇完今屆歐霸盃決賽後，Peter有感而發，進攻足球確係可以娛樂觀眾，而且能夠令老細開心，不過，若果真係想贏冠軍，有好嘅龍門同緊密嘅防守先係捧盃先決條件，呢個定律基本上所有歐美名帥都會明白。

除非好似哥迪奧拿五、六年前喺巴塞隆拿手執美斯、沙維同恩尼斯達三條煙，當年佢哋去到最高峰時期可以打漂亮控球在腳嘅足球，去到今年大賽，拜仁用呢種華麗踢法喺歐聯受挫，而巴塞隆拿截稿前仲未知能否蟬聯西甲，可見今時今日悅目全攻型踢法已非球壇必勝之道。

無論係籃球、足球、美式足球，有紀律嘅防守都好重要。Peter對足球態度鮮明，一定係由龍門、中堅同防中呢條脊骨做骨幹，淨係睇西維爾喺決賽點樣守到賓菲加一戙都冇，加上無敵門將比圖表現出神入化，令呢支處於弱勢嘅球隊成功登上寶座。至於賓菲加仍被古特曼魔咒困擾，自62年被呢位舊帥詛咒後，過去52年都未能奪取歐洲賽冠軍，都可謂係球壇一大經典。
巴西咁熱想快都難

嚟緊世界盃巴西部分地方都幾熱，喺咁熱嘅環境下更難打快速同高效足球，70年同94年世盃好多球隊都係拖慢嚟打，唔想一早消耗氣力搞到尾段被對手有機可乘。回顧賓菲加之失，再展望嚟緊世界盃，防守將會係各隊爭標嘅重要元素。

金句：漂亮足球娛樂觀眾，龍門加防守奪標歸！