馬威力東山再起

不死鸟

馬季餘下個半月時間，練馬師冠軍之爭越趨激烈，本以為大摩可一枝獨秀帶離其他練馬師，直至季尾奪得冠軍寶座，誰知近期局勢有180度轉變，大摩連續三期賽事沒有馬贏，反之其最大對手蔡約翰和方嘉柏就頻頻贏馬，現時更有急起直追之勢，相信大摩在餘下時間難以安寢。
論氣勢之強，方嘉柏最旺，前次賽事連中三元，剛戰又以「當旺」贏馬，確實勝勢停不了。今次方家軍又大舉出擊，相信要贏馬不難，不過要配合埋有好賠率，大家不妨留意第七場「馬威力」。近仗此駒回落至4班作賽後，牠的表現一仗比一仗好，前仗更差少少便可在谷草1800米贏馬，反映其狀態已回復水準。
剛戰此馬再跑谷草1800米已有票數支持，可惜排12檔，早段走蝕位，兼又要耗力領放，最終末段無以為繼，落敗可理解。今次轉跑田草1800米，大家唔好因為牠近期連番在谷草上陣，就忽視了是次牠轉跑田草不合，事實上，田草1800米亦是其最佳路程，是次由方仔愛徒湯智傑上陣，當有一爭之力。