打比郡QPR半場冇高低

猪拉多纳

17.5億爭奪戰 穩字行先

溫布萊球場今夜上演英冠升班附加賽決賽，打比郡對昆士柏流浪（QPR），打比郡喺兩回合準決賽以總比數6比2大炒白禮頓，強勢入決賽，反觀QPR同韋根喺次回合踢到加時先至擊敗對手晉級，過程一啲都唔輕鬆，今場決賽自然成為被睇淡嘅一隊，不過呢場波關係重大，勝方會贏得價值17.5億港元的英超席位，兩軍肯定會穩字行先，半場和最值捧。

（TVB 301周六晚10時直播）

雖然今場升班附加賽決賽嘅矚目程度同歐聯決賽差9條街，但講重要程度就不相伯仲，係人都知英超喺全球有幾受歡迎，能夠升上英超踢，球會收入閒閒地都高過喺英冠好多倍。
升班留班天與地

據英國《每日郵報》指出，成功升班嘅一隊來季可以賺到1.34億鎊（約17.5億港元）嘅利潤，而輸波一隊只會攞到今場嘅300萬鎊（約3,925萬港元）門票收入作為安慰獎，真係天與地嘅分別，所以呢場波唔單止關乎球會同球員嘅前途，更加係關乎「錢途」﹗

呢類一場過嘅生死戰，對兩隊嚟講都係不容有失，球員喺比賽嗰陣肯定會加倍小心，以免犯錯，踢法穩陣行先係無可厚非嘅事，好大機會開「半場和」。

今場雙方嘅領隊彼此都熟晒路，打比郡領隊麥卡倫曾喺舊年7月加入ＱＰＲ教練團，幫過領隊夏利列納出謀獻策，跟住9月先過檔打比郡擔任「綿羊」主帥。夏利叔一向沿用傳統英式踢法，以穩陣為主，今場深知打比郡攻力強勁，更會使出「泊大巴」穩守突擊戰術，麥卡倫亦知道夏利叔會出呢一套，都唔敢採取全攻打法，先做好防守，費事畀ＱＰＲ偷雞呀嘛！