俄羅斯難啃斯洛伐克

猪拉多纳

積極備戰世盃嘅俄羅斯，今晚會喺主場同斯洛伐克踢熱身賽，雖則喺下月初公布終極名單前，班國腳為搭上世盃列車唔會揸流攤，但斯洛伐克都唔係善男信女，熱身賽表現仲好過踢世盃外圍賽，今場隨時可以全身而退，2.88倍「讓客」值博。

（廣東體育周一晚10:00直播）
卡比路感冒冇帶操

俄羅斯主帥卡比路日前率先篩走雷丁前鋒普格恩耶克，直到6月2日公布最終大軍名單前，無論係沙場老將基沙哥夫、丹尼素夫，抑或後起之秀奧歷沙托夫同舒安尼高夫，喺未確保攞到世盃列車「車飛」之前，唔使問肯定搏到盡。不過感冒「打敗仗」嘅主帥卡比路，雖然盛傳今場會喺場邊督師，但佢已經連續缺席咗幾課操練，即使奧歷沙托夫話有將國家隊操練片段傳畀卡帥睇，後者再通過副手向球員落Order指點迷津，但對今場備戰肯定有影響。

咪睇對手斯洛伐克入唔到世盃決賽周就以為係魚腩，實情呢班波喺無壓力嘅熱身賽反而表現更好，近幾場撼低晒波蘭、以色列同黑山幾隊。更何況主帥高沙克例牌喺半場玩「中前場大輪換」，國腳往往得半場時間騷哥利，肯定全部搶韁冇保留。其中贊迪錫同羅拔馬克近兩場分別後備上陣建功，加上日前鬥黑山被收起嘅維迪同咸錫亦會擔正搏殺，今戰絕對有本錢全身而退。