西班牙嗒魚腩-2照撐

猪拉多纳

邊緣鬥牛士拉票睇呢鋪

上屆世盃盟主西班牙踏上衞冕征程之前，今晚先喺國際熱身賽主場迎戰南美球隊玻利維亞。由於歸化前鋒迪亞高哥斯達傷勢唔多樂觀，「鬥牛國」領隊迪保斯基亦改口風可能唔選「迪哥」，令到「契仔」費蘭度托利斯等邊緣人趁住呢個最後機會，盡數魚腩玻利維亞趕搭世盃尾班車，直取讓球主勝。

（now 632周六凌晨4時直播）

由於皇馬與馬體會剛於歐聯決賽激戰咗一場，兩軍球員今仗均獲得免役，領隊迪保斯基特登揀咗19人應付玻利維亞，包括不在早前30人初選名單嘅愛華頓前鋒迪路菲奧。
「迪哥」受傷明醒費托

不過馬體會箭頭迪亞高哥斯達一傷再傷，搞到迪帥近日亦要改口話會尊重軍醫決定，有可能放棄徵召「迪哥」，令到今季喺車仔表現麻麻嘅費蘭度托利斯重現入選希望，最奇怪係中鋒尼格度及洛蘭迪都冇入選呢場熱身賽名單，擺明畀機會「契仔」費托喇。

迪帥講過6月2日會公布征戰世盃嘅23人名單，即係話今仗係費托、桑馬達、辛迪卡索拉、艾拔圖摩蘭奴等邊緣人嘅最後拉票機會，難得遇上近八仗未贏過嘅魚腩玻利維亞，仲唔爭取表現嚟一場大屠殺，氹下迪帥博入選出戰世盃咩，玻軍質素所限凶多吉少，讓球主勝冇甩拖。