智利「濕平」都唔畀慘過坐監

猪拉多纳

和西班牙同處B組嘅智利明早將於熱身賽主場鬥非洲球隊埃及。賽前智利足總向國腳發出嚴格指令，大軍喺巴西備戰及應付世盃賽事期間禁酒、禁女及禁行街。球員喺食早餐時只能飲水及天然果汁，晚餐後可以帶生果及酸奶帶返房，但禁止飲用任何酒精類飲品，同時下令所有球員女朋友及太太只能喺訓練後去大本營探班，但只限於接待廳見面，一律禁止入房，而且所有商場購物活動亦會被禁止，總之要全情投入到訓練及比賽。只不過，以往智利球星多次傳出偷跳傳聞，不知道今次於嚴格規距下是否會聽話呢？

此外，効力皇家蘇斯達的智利門將哥迪奧巴禾據報已和巴塞隆拿達成協議，日內將會正式宣布過檔。巴塞早前已經從德甲慕遜加柏羅致達史特根，代替即將離隊嘅域陀華迪斯，預計哥迪奧巴禾好大機會出任達史特根副手。
友賽埃及維達爾未出得

至於明早場熱身賽，智利中場維達爾早前接受手術仲未可以上陣，對進攻有一定影響。埃及雖然冇份踢世盃，但喺非洲排名僅次科特迪瓦，實力非同小可，今場捧讓球客勝。

（TVB 302周六早上8時30分直播）