霍金獻計英格蘭食「魯」

猪拉多纳

英格蘭備戰世盃如火如荼，今晚熱身賽喺溫布萊迎戰秘魯後，就會去邁阿密同厄瓜多爾及洪都拉斯拍跳。「三獅喼頓」謝拉特賽前講明要「過3關」，「頭關」對住鋒線零威脅嘅秘魯，「三獅軍團」勢必殺無赦，「讓球主勝」咪錯過。

（now621台周六凌晨3:00直播）
秘魯鋒線天殘地缺

謝拉特日前集訓嗰陣話：「我哋喺呢3場熱身賽一定做齣好戲，建立信心同信念！」隊長有令，國腳點敢唔聽，況且史達寧、史杜列治等幾名利物浦戰將同「四哥」夾慣夾熟，進攻自然得心應手。英國著名物理學家霍金，更為英格蘭出謀獻策，話只要做足「3大定律」，就能夠提高奪標機會！

對家秘魯由喺3月接手、12月約滿嘅主帥賓高查領軍，今場處子戰梗係想踢場好波博長約，弊在秘魯自去年6月擊敗厄瓜多爾後，連續6場未贏過，再者，法芬、荷西古里路同比沙路幾件進攻核心都不在陣中，火力曳爆，「三獅軍團」防線冇後顧之憂實喪攻，「讓主」冇走雞。
霍金「3大定律」

1. 英格蘭踢433勁過442。

2. 紅色波衫令球員更自信同進取，奪標機會激增20%。

3. 金髮或光頭球員射12碼可信啲。