荷蘭加納爆大鑊

猪拉多纳

「黑星」壓境 「橙軍」還火

世盃開幕前熱身賽陸續有來！同西班牙同處B組嘅荷蘭搵嚟G組「黑星」加納拍跳，嚟到世盃備戰最後階段，荷蘭唔敢再揸流攤，球員紛紛為入選終極23人世盃大軍而搏命，而且荷蘭主帥尹戈爾一改近年球隊側重穩守突擊嘅風格，重新將進攻足球注入「橙軍」身上，今場主場出擊，勢會踢出華麗進攻風格畀一班荷蘭粉絲欣賞，加上加納鋒線火力亦猛，兩軍鬥攻大盤值得捧場。

（now 632 及TVB 13周日凌晨2時30分直播）
尹戈爾再倡進攻足球

荷蘭主帥尹戈爾早前正式獲曼聯任命為新帥，依家佢可以專心為荷蘭備戰世盃，第二度執教「橙衣軍團」嘅尹帥決心為球隊重新注入進攻踢法，踢番433陣式，放棄前幾任主帥嘅保守作風，尹帥更講到明會以洛賓、史奈達同尹佩斯組成進攻三叉戟，洛賓喺德甲踢到曉飛，史奈達就技術拚勁兼備，而今季喺英超冇乜替曼聯上過陣嘅尹佩斯更係養精蓄銳，荷蘭有呢3寶在陣，攻力更有保證﹗

「橙軍」雖然近4場熱身賽都贏唔到，攻力又唔算好強，不過距離世盃仲12日，相信一班球員會開始進入作戰狀態，而且經過數周集訓後，尹帥至今仍未扑錘選出23人世盃大軍名單，相信都係想踢埋熱身賽先再決定，為咗有得踢世盃，班球員仲夠膽喺呢個時候Hea踢咩？不過，荷蘭最大隱憂係防線，中堅華亞爾同馬田斯恩迪並非頂級守將，一對閘活力有餘卻經驗不足，防守十分脆弱，今場面對攻力唔曳嘅加納，隨時入得多又失得多﹗
王子拍基恩前線孭飛

「黑星」加納陣中兩粒星就係27歲中場「王子」奇雲保定同基恩，奇雲保定喺2011年宣布退出國家隊，佢今季喺史浩克表現出色，喺13年再次回歸「黑星」，即幫加納鎖定巴西世盃入場券，有佢同前線孭飛人物基恩拍住上，進攻火力獲大幅提升，加上熱身賽壓力唔大，即使作客一樣可以放開嚟踢，有機會把握荷蘭防線嘅弱點偷雞入波，今場入球大值捧。