心跳搶分+1捉鹿角

猪拉多纳

世盃仲未開打，不過日聯盃分組賽踢得如火如荼，今日下晝A組賽事鹿島鹿角主場迎戰清水心跳值得留意。唔好睇鹿角喺聯賽好醒，佢哋對呢隻盃仔冇乜興趣，心跳可趁機捉到鹿兼脫埋角，有得受讓梗係捧讓球客勝喇。

（周日下午2時開賽）

上季鬥到直路僅得第五，鹿島鹿角今季決心再衝擊聯賽錦標，在日本中場遠藤康及巴西射手達維帶領下，現時位列四哥，爭標唔係冇機會。但與其他勁敵相比，鹿角嘅板櫈深度較淺，必須作出取捨，從佢哋於日聯盃五戰兩勝三負排尾二，作戰心態明顯唔及聯賽，以上周中主場對神戶勝利船為例，原本預計係勢均力敵，點知開波冇耐即失守，成班波已經開始收韁，最終慘吞三蛋可見一斑。清水心跳雖然於日聯盃兩連敗，但表現唔算曳，依家仲喺A組排第二添，由於佢哋聯賽位處中游，梗係想喺盃賽發圍，況且有超班射手路華高域壓陣，遇上心不在焉嘅主隊，勢必捉到鹿兼脫埋角，讓球主客和仲有得受讓咁筍，讓球客勝咪錯過。
B組鯨魚強襲紅鑽

講完A組不如講吓B組，現排榜首已篤定出線嘅浦和紅鑽主場火併三哥名古屋鯨魚，鯨魚近三仗日聯盃贏晒，前日本國腳田中鬥莉王及玉田圭司輪流發威，不過紅鑽勝在防守固若金湯，上周中撞正有弗爆前鋒基斯坦奴達施華壓陣嘅甲府風林，都能將其威脅減到最低兼擸晒三分，絕對唔嘢小，挾住近七主場全勝嘅氣勢，加上有近五交手贏四次嘅佳績支持，要釣到呢隻鯨魚唔係難事，主勝乃不二之選。