日本拍跳做細界

猪拉多纳

哥斯達黎加試「大巴」陣

日本上場熱身賽喺主場對住魚腩部隊塞浦路斯都只係小勝一粒，睇到球員一方面仲未打起狀態，另一方面係留有一手，呢支亞洲勁旅聽朝九點會喺美國同哥斯達黎加進行拍跳，哥國守強攻弱，依家仲要冇埋首席射手沙保里奧，科娜認為揀細盤更為明智。

（周二早上9時開賽）

日本主帥沙哲朗尼早早決定世盃廿三人名單，上周對歐洲三線球隊塞浦路斯賽前，一眾主力如「新國寶」本田圭佑同門神川島永嗣已歸隊，對住塞軍佢兩個亦有聯同香川真司、內田篤人、長友佑都等主力正選上陣，不過強陣出擊嘅日本竟然贏得一粒，可見班球員仲未上力，同時亦可能費事搏命過龍，喺呢個緊要關頭搞到受傷就唔好啦！
練定守波抗D組列強

日本今場對手絕對唔弱，話晒哥斯達黎加都攞到世盃入場券，實力有番咁上下，哥軍日前宣布廿三人世盃大軍名單，於世盃外圍賽幫球隊攻入八球嘅三十二歲鋒線主將沙保里奧喺訓練中斷腳，最終落選，對本身已經冇幾多個有質素前鋒可用嘅哥斯達黎加嚟講真係一大打擊，要靠經驗略嫌不足嘅廿一歲小將祖爾甘保喺前線孭飛，攻力定有影響。不過哥軍勝在有防守，身處死亡D組嘅佢哋預咗會喺決賽周「泊大巴」迎戰三大勁旅意大利、英格蘭同烏拉圭，今場對整體實力較強嘅日本更係試「大巴陣」嘅好機會，細盤值得捧場。