巴西照炒巴拿馬

猪拉多纳

大菲整肅軍紀 畀副選上位

世盃熱身賽輪到巴西登場，呢支世盃主辦國會喺主場迎戰中美洲弱旅巴拿馬。「森巴兵團」一眾球星仲未收拾放假心情，幾位主將狀態不足之餘，連態度都好懶散，搞到領隊史高拉利大動肝火，揚言今仗會大幅改變正選陣容，畀班大帝知道唔係坐定粒六有得踢。不過，巴西副選人腳全屬高質猛將，必定把握機會「騷哥利」搶正選，表現會更落力，絕對炒得起巴拿馬，直取讓球主勝。

（TVB301周三凌晨3時直播）
懶散主力隨時被雪

現時巴西國內反世盃浪潮高漲，加上球場工程延誤問題，「森巴兵團」更加需要以出色表現爭取國民支持。不過，事實卻相反，睇番佢哋近日操練態度相當Hea，經常被記者影到喺度「吹水」傾偈。「大菲」史高拉利當然睇到眼火爆，收操後公開喪鬧球員：「我唔鍾意呢種練習，所有嘢都唔鍾意，完全錯晒！當我感到唔妥，我惟有喺球場搵解決方法，直至我滿意為止。」言下之意，「大菲」好可能變陣出擊。

另外， 巴西足總宣布，隊長堤亞高施華、中場荷西保連奴及費蘭甸奴因狀態不足，需要留喺大本營接受特訓，提升體能，今場唔會上陣。因此，靴蘭尼斯、路爾斯古斯達禾、丹迪等副選可望擔正，肯定落多幾錢肉緊，盡數對手，趁博取史高拉利歡心，希望喺決賽周獲得正選上陣機會。
三流弱旅無力招架

巴拿馬實力只有世界三流水平，從未試過打入世界盃決賽周，今屆亦唔例外，陣中大部分主力喺哥斯達黎加、墨西哥、哥倫比亞等美洲球會搵食，有幾多斤両可想而知。更何況巴拿馬今仗只係陪練角色，戰意有限，面對一班急於建功立業嘅巴西副選，勢難招架，預咗大敗收場。