巴西怕傷勒住踢 玩細有揸拿

猪拉多纳

「大菲」驚出事 陣容要問軍醫

巴西出場陣容軍醫話事！世盃東道主巴西今晚出擊，喺戈亞尼亞市同巴拿馬拍跳。咪以為「森巴兵團」技高一籌就炒硬巴拿馬，實情係領隊「大菲」史高拉利擔心班國腳出事，今鋪出咩人都要問過軍醫，球員為保世盃夢隨時勒住踢，與其博巴西大勝，倒不如向中位數3.5球嘅1.88倍入球細埋手。

（TVB301周三凌晨3:00直播）

意大利中場蒙杜利禾同墨西哥指揮官蒙特斯，都喺前日嘅熱身賽「賴嘢」，齊齊緣盡世界盃。血腥熱身賽引爆傷兵潮，你估列強領隊唔驚呀？巴西主帥史高拉利都有啲「淆底」，尋日喺里約熱內盧督操時接受巴西電視台訪問，講明會收起3至4名常規主力，又話派咩球員落場都要問准軍醫，確保旗下「森巴兵」平平安安出戰決賽周。
「阿包」教頭有料到巴拿馬進步神速

據巴西《ESPN》透露，巴西中堅堤亞高施華有輕傷唔會隨隊，翼鋒班納特安尼斯奧同荷西保連奴喺分隊賽嗰陣火星撞地球，要齊齊退下火線，相信「大菲」都唔會冒險派佢哋落場。即使「森巴兵團」粒粒皆星，但尼馬、侯克同費特等球星會唔會喺呢場無關痛癢嘅熱身賽搏盡，亨格比利真係好有保留。

巴拿馬戰鬥力同巴西差天共地，但過去19年巴拿馬嘅世界排名由150位跳升至家陣嘅35位，如果唔係喺中北美洲外圍賽煞科戰輸畀美國，巴拿馬仲有機會爬墨西哥頭殺入附加賽，證明呢支中美國家隊近年進步唔少。哥倫比亞籍新帥達里奧高美斯上仗首度領軍，即帶領巴拿馬賽和塞爾維亞1:1，呢位綽號「El Bolillo（阿包）」嘅教頭雄心壯志話要展開「俄羅斯行動」，目標係帶隊進軍2018俄羅斯世盃，仲大口氣到想砌低今仗對手巴西添，對住隨時勒住踢嘅「森巴兵團」肯定搏盡，就算輸都唔似會輸得太肉酸，敲細啱數！