諾在其中:（馮諾嘉）熊中雄檔佳捧得過

不死鸟

前個賽日馬會按照慣例抽籤檢驗騎師尿液，結果發現徐君禮尿液樣本含有違禁物質，搞到佢即時禁止出賽，今戰所有坐騎均須易配。小妹識咗徐君禮好耐，絕對相信佢嘅為人，諗落有可能係一個誤會，希望出咗化驗結果後，成件事會盡快有個了結。佢嘅七匹坐騎中，自己最鍾意第二場五班千二米嘅「神機妙算」，呢匹馬仲報咗名跑禮拜日賽事，睇嚟練者好有決心，趁馬匹有狀態時全力搏殺。

神機妙算必拼

        「神機妙算」由四班落到嚟五班，但在港跑十七次仲未開齋，相信台前幕後都好心急想盡快交代，難得上仗喺田草千二米後上跑第三，取得上陣以嚟首次上名紀錄，既然有進步兼呢次負輕磅，三甲一席應走唔甩，睇吓普萊西會唔會冷手執個熱煎堆﹗

        第八場二班千二米，「熊中雄」同程贏過三次夠首本，而季內唯一頭馬就喺二班同程贏「魅力漢子」，爆出十六倍冷門。前仗初配柏寶跑一班泥地千二米，結果輸畀頭馬「電光能源」兩個幾馬位跑第四，表現對辦，既然鞍上人近排手風順，仲要抽埋四檔起步，加上同場有唔少強手，相信「熊中雄」臨場點都會有分頭，不妨以佢作為重心。

        第五場三班千二米，小妹同樣睇好柏寶坐騎「化工之昇」，呢匹三歲馬至今跑過五場，結果獲冠亞軍各一佳績，而且都係出自呢個路程，足證路有專長。大前仗初次交由柏寶操刀跑同程，臨場被捧成兩倍大熱門，可惜輸短頭位畀「揀得準」跑第二，上仗轉爭田草三甲不入唔可以作準，今次回師谷草兼續配柏寶，有力施回馬槍。