世界漫遊:（彼德）鳳凰寶駒力足反彈

不死鸟

舊年嘅日本馬后「伏特加」，自從經歷過杜拜嘅失望之旅後，重返本土冇再失威，響剛啱嘅禮拜日東京競馬場重頭戲第四屆維多利亞一哩賽，再一次以無敵姿態贏馬，取得服役以嚟第五場一級賽勝利。

        ○七年以雌馬身分捧走日本打吡、舊年攻下安田紀念同埋天皇賞，東京競馬場可以講係「伏特加」嘅主場，今次重臨福地，擁躉並無因為呢隻馬響杜拜兩戰無功而熱情冷卻，臨場此駒依然備受追捧，熱到兩倍都唔夠，結果呢匹馬后響武豊胯下重現霸氣，出頭後愈帶愈遠，最終響呢場只限馬女參戰嘅千六米賽事大勝七個馬位，表現技驚四座。

        睇番「伏特加」服役以嚟廿二戰取得八冠四亞兩季，獎金連埋特別獎金已累積高達八億八千七百萬日元，兌番做港紙都有成七千一百四十幾萬元，亦係當地有史以來贏得獎金最多嘅雌馬。

        賽後「伏特加」馬主谷水雄三透露，嚟緊嘅部署將會一如舊年，全力爭取衛冕安田紀念，而今年亦會係呢匹五歲馬服役生涯嘅最後一年，之後就會轉做種馬傳宗接代。至於到底會係跑完安田即刻退役，定抑或掃埋下半季嘅大賽先至榮休﹖就暫時未有定案。

        講開雌馬，聽晚出戰頭場五班一哩嘅「鳳凰寶駒」同「伏特加」一樣都係五歲雌馬，但兩駒質素差天共地。事實上，香港向來較少雌馬可以取得好成績，數嚟數去都好似只得「東成西就」同「勝威旺」可以上到高班，或者與競賽環境不合有關。

        不過，依家「鳳凰寶駒」減到十七分，計落應具一定反彈條件，上場跑田草千六，只係輸畀頭馬「好心情」四個半馬位，已冇之前輸咁遠，今仗出爭對手較弱嘅谷草，有望取得零的突破。