多角度分析隨時執到寶

猪拉多纳

Tips 1小組遇弱易出神射手

過去3屆世界盃神射手獎得主都有同一特點，就係當時分組賽抽到對手弱爆嘅「靚籤」。今屆身處E組嘅法國正正係呢個情況。法國同組另外3隊對手瑞士、厄瓜多爾及洪都拉斯，實力完全唔係法國嘅級數，「高盧雞」箭頭賓施馬應可喺他們身上取得唔少「士哥」。

相隔8年後再次打入決賽周嘅新貴比利時亦算抽到「好籤」，H組另外3隊有俄羅斯、南韓和阿爾及利亞。雖然俄羅斯、南韓唔易應付，但以比利時射手盧卡古高人一等嘅身形，高空轟炸隨時大有斬獲。而阿爾及利亞嘅實力同比利時有一定距離，呢位「新魔獸」有機會喺呢場入幾球，乘機搶埋神射手獎。
Tips 2單天保至尊有着數

A組強隊林立，墨西哥要面對巴西、克羅地亞及喀麥隆，出線談何容易。墨軍要出線，除咗防守要頂住另外3隊嘅攻勢外，更要靠射手查維亞靴南迪斯在前線衝鋒陷陣。「小豌豆」雖然今季喺曼聯變咗第4前鋒，上陣時間少得可憐，但呢位射手喺國家隊一有發揮嘅空間，都會即時「鹹魚翻生」，而且深知球隊「食粥食飯」靠自己，上陣時定必更落力。

另一隊要單天保至尊嘅球隊，就係有曼城前鋒迪斯高坐鎮嘅波斯尼亞。迪斯高身為國家隊史上首席射手，波軍喺歐洲區外圍賽轟入30球，有10球就來自迪斯高，可見波軍進攻十分倚重呢位曼城箭頭。迪斯高頭頂腳踢堪稱「周身刀，張張利」，而且腳下功夫都唔錯，要「嘜死」佢絕對唔容易。
Tips 3大賽球員零舍醒神

有啲球員就算喺球會度過咗失望嘅一季都好，一踢國際大賽都會特別醒神。依家「大賽射手」的代表，非德國嘅湯馬士梅拿同西班牙前鋒費蘭度托利斯莫屬。

德國國腳湯馬士梅拿成日做「影子前鋒」，仲入唔少波。佢喺2010年南非世界盃對澳洲嘅分組賽，射入國腳生涯首個入球後就一發不可收拾，整個賽事為德國射入5個入球，加上有3次助攻，成功壓過西班牙射手韋拿及荷蘭嘅史奈達奪得金靴獎，從此聲名大噪。

「狂牛王子」費托自從由利物浦加盟車路士後，狀態一沉不起，不過上年洲際盃同2012年歐國盃，佢都做咗金靴獎得主，絕對係大賽射手，所以無論佢喺球會點差都好，一打大賽絕對唔可以睇小。