「特別項目」考眼光 森巴兵團費特「入球」抵玩

猪拉多纳

嫌買邊隊贏、大細同波膽冇難度？唔緊要，自問對球賽發展同局勢特別有心得嘅你，特別項目肯定夠晒挑戰性！

試諗吓，如果你連邊個球員會先食「牛肉乾」、「紅牌阿姑」甚至有波入都估得中，嗰份成功感真係不得了，最重要係咩呀？賠率夠晒分頭吖嘛！

通常特別項目都會開啲球星盤口，就以巴西為例，前線重心尼馬及費特都應該榜上有名，雖然尼馬係「森巴兵團」攻擊重心，不過除咗入波之外，「新比利」亦好擅於喺邊線發難為隊友鋪橋搭路，呢個時候機會主義者費特分分鐘成為最大得益者，所以費特嘅特別項目值得留意「入球」一項。
博本田圭佑 靠罰球建功

至於日本嘅賽事就一定要吼實本田圭佑！呢位「新國寶」堪稱「死球專家」，基本上「藍武士」所有罰球、死球都會由佢一手包辦，雖然主帥沙哲朗尼今次世盃揀咗5位前鋒出戰，不過講到埋門把握能力，5名前鋒都只係一般，所以不如博吓本田罰球建功開「入球」仲抵玩。