信女人直覺 比利時入4強

猪拉多纳

世盃仲有兩日就開波喇！每屆開波前都有好多唔同預測，南非世盃時德國八爪魚保羅一戰成名，今屆中國就推出「熊貓預測世盃」。不過其實女人嘅直覺都好準，等我又做吓神婆，送5個預言畀大家啦！
1. 巴西封王

一來佢哋有主場之利，二來有一大班球星坐鎮，佢哋係世盃奪冠次數最多嘅一隊，質素梗係有番咁上下，今屆有尼馬帶領嘅巴西喺自己地頭出戰一定特別醒神，我睇好佢哋6奪冠軍！
2. 比利時殺入4強

比利時絕對係今屆一大奇兵，佢哋陣中粒粒皆星全屬當打，又未試過喺國際大賽攞過咩獎項，必定好想爭取佳績證明自己實力。況且佢哋H組對手唔算好強，要出線冇難度，殺入4強唔係冇可能。
3. 日本輕鬆入16強

日本一班外流攻擊球員已經喺歐洲球壇證明實力，好似岡崎慎司今季喺德甲入咗十幾球，只要主帥沙哲朗尼發揮出佢哋威力，面對C組唔係咁勁嘅對手，要出線其實冇咩難度！
4. 美斯做神射手

雖然美斯今季喺西甲風頭畀死對頭C朗蓋過，但C朗為葡萄牙披甲時經常畀對手Mark到實，加上傷勢又未好番晒，美斯今季樣樣都輸畀佢，隨時喺世盃大爆發報仇，贏番C朗一次。
5. 球員爆夜蒲醜聞

最後一個預言就係球場以外，我估喺世盃期間，一定會有球員爆出桃色新聞！巴西除咗陽光與海灘仲出名多靚女，話唔定分組賽出局嘅國家隊，有球員夜晚走去紅燈區「到此一遊」！