巴西Q膽冷敲意大利

猪拉多纳

今屆世盃喺足球強國巴西舉行，若然要玩世盃決賽組合，巴西相信可以成為鐵膽，而搵巴西拖西班牙或者阿根廷就係最正路嘅投X選擇。若然鍾意吼冷，不妨一試德國對意大利。

巴西近年改踢務實足球，防守穩健，前線有尼馬、侯克同費特組成進攻三叉戟，再加埋地利優勢，要殺入決賽唔難。而喺過去19屆世盃之中，17屆都有歐洲球隊殺入決賽，當中近年橫掃各項大賽冠軍嘅西班牙就係大熱。雖然西班牙身處B組，一旦小組次名出線就要喺16強面對巴西，不過佢哋要小組首名出線避開巴西相信都唔難，因為西班牙同組最大競敵都係上屆世盃決賽對手荷蘭，何況荷蘭已係今非昔比，出現青黃不接問題，所以西班牙有力小組首名出線。
阿根廷靚籤好着數

不過，歐洲球隊最大嘅敵人係天氣，球員往往踢唔慣濕熱嘅南美天氣，成為歐洲球隊從未試過喺南美洲攞過世盃嘅主因，所以如果覺得西班牙揀唔落手，可以諗吓巴西拖另一支南美球隊阿根廷。阿根廷喺F組一枝獨秀，首名出線問題不大，估計走下線嘅對手唔算強，入決賽嘅機會頗大。

最後想扒冷嘅朋友可以考慮德國對意大利，現時德國擁有黃金一代，球員有技術又有經驗，而且德軍向來好識喺大賽走線，近3屆世盃均入4強兼有1次入到決賽，值得捧場。至於意大利不嬲係大賽專家，成日喺畀人睇淡嘅情況下「唔聲唔聲，嚇你一驚」，06年世盃就係一個好例子，鍾意冷門嘅朋友就最啱揀呢隊波。

熱門推介：巴西Vs西班牙、巴西Vs阿根廷

冷門推介：德國Vs意大利、巴西Vs意大利