華盛頓細頂衝擊

猪拉多纳

喺大家等睇世盃等到頸都長嘅時候，不如睇吓美職解吓悶，聽朝打頭炮嘅有蒙特利爾衝擊主場迎戰華盛頓聯隊，衝擊剛喺加錦賽決賽擊敗FC多倫多成功衞冕，不過今場對住表現大躍進嘅華盛頓聯隊難言穩勝，不妨改捧入球細，因為華盛頓聯隊近六場有五場開細盤唔怕追。

（TVB 302周四早上7時30分直播）

蒙特利爾衝擊剛喺加錦賽決賽以1比0揮低FC多倫多，兩回合總比數贏2比1，連贏兩屆呢項冠軍，衝擊近期防守唔錯，呢場決賽都係憑住防守贏波。衝擊入面最有星味嘅戰將應該都係意大利前鋒迪華奧，不過呢位37歲老將今季表現進一步跌Watt，喺前線孭唔到飛，而另一前鋒麥恩亞尼又唔係多產射手，所以球隊今季攻力唔算強，今仗主場出戰都唔係咁易攻得入防守不俗嘅華盛頓聯隊。
伐木者「大」慣達拉斯

上季東岸魚腩華盛頓聯隊今季成績大躍進，上季踢咗34場先得3勝，但今季踢咗14場已經贏咗6場，球隊今季以防守取勝，6場勝仗有5場係保持不失，今場作客更會以守為先，然後再伺機進攻，細盤可以一捧。

另外一場美職波特蘭伐木者主場對FC達拉斯，伐木者近期攻力不俗，前鋒費蘭度亞迪、烏魯迪輪流發威，而FC達拉斯近三次同伐木者交手都開大盤，今場一於再捧入球大！

（TVB 302周四早上10時直播）