世界漫遊:（彼德）悅勝豪情縮程施冷箭

不死鸟

繼年前日本國寶「週日寧靜」後，早幾日又有另一匹種馬被蹄葉炎奪去寶貴生命。服役贏過愛爾蘭二千堅尼同美國育馬者盃一哩大賽嘅「巴拉飛」，患上呢個病後藥石無靈，結果上個禮拜三被人道毀滅。

        當年夥拍「巴拉飛」東征西討嘅戴圖理，當佢聽到消息後亦非常傷感，因為呢匹馬係佢策騎生涯嘅里程碑，招牌跳馬動作亦係騎「巴拉飛」贏育馬者盃一哩大賽個陣，第一次公開「表演」。「巴拉飛」受歡迎程度雖唔及同屬Sadler's Wells嘅「望族」，或者更年輕嘅「天文學家」，但子女普遍都有番咁上下質素，難怪近年每宗配種費仍然企硬一萬五千歐元。

         講番今晚賽事，同樣出自Sadler's Wells嘅「悅勝豪情」，質素當然唔可以同「巴拉飛」相提並論，不過響香港嘅中班賽仍然有作為，如舊年四度掄元便已盡顯威力。今季因傷患關係，搞到依家只跑得三場，但少打硬仗體力相對較對手優勝，加上轉投鄭廐後未交代，呢次縮程跑一哩，必有分頭嘅馬咪當佢冇到。

         其餘兩匹心水可博文廐「又靚又叻」同「一團威」，其中第四場四班千二米嘅「又靚又叻」，在港已上陣四次，每跑一仗都見呢匹三歲馬有一定進步，呢場排十二檔必成冷門，小心突如其來。
  至於出爭第六場三班一哩嘅「一團威」，上仗初出輸唔遠，既然響澳洲贏過千四米，加程應冇問題，隨時可以殺個措手不及。