玩殘格仔軍 巴西冧國民

猪拉多纳

萬眾期待嘅世界盃，今晚深夜4點開波喇！好高興可以喺度同《太陽波經》嘅讀者，同埋東方沙龍嘅球迷朋友，一齊傾吓波經，歡度呢屆世界盃。揭幕戰，東道主巴西迎戰克羅地亞，我相信主隊最少贏兩粒，撐1.8倍「讓球主勝」，甚至讓1.5/2球嘅上盤，應該無問題！信我！

（無綫翡翠台、明珠台及TVB13、now818台、中央5台周五凌晨4:00直播）

雖然好多人同數據都話世盃揭幕戰多數爆冷，被睇好嗰隊好多屆都贏唔到，我本來都係咁諗，但從一啲好現實嘅情況去睇，我就覺得巴西呢場波係唔可以唔贏，甚至唔可以踢得唔好！
示威升級揭幕唔贏好大鑊

點解我咁講？大家都睇到愈近世盃揭幕，巴西國內就愈多示威，仲要係由早期就咁舉吓牌、嗌吓口號，到近排升級到警民衝突，一邊爆晒樽、掟晒燃燒彈，一邊就出水炮、催淚彈，同時警察、公共交通嘅司機又話罷工，動盪到不得了！如果呢個時刻，被視為國民希望嘅國家隊，第一場贏唔到或者踢得屎會點？真係諗都唔敢諗！相信場波未踢之前，巴西政府已經向足總落晒柯朾，希望佢哋一定要贏。

就算講番球隊實力，巴西點都高過克羅地亞啦！大家諗番之前嘅洲際國家盃，西班牙夠勁啦，喺決賽對住主場出擊嘅巴西，結果咪一樣慘敗。主場出擊踢世盃揭幕戰，係關乎榮辱，之後信唔信巴西都好，今場第一場一定要信！雖然早兩日有消息話王牌尼馬練波時整傷右腳，但之後證實只係虛驚一場，大家可以放心。最緊要係領隊史高拉利同傳媒派定心丸，話尼馬無事會拍住侯克攻堅，配合正選上陣嘅奧斯卡杜斯山度士，呢個攻擊組合仲唔夠殺呀？
克羅地亞莫仙歷退隊文迪蘇傑停賽

克羅地亞係好波，但王牌射手文迪蘇傑因喺外圍賽領紅今場要停賽，火力打折扣，啱啱又有中場莫仙歷因傷退隊，球隊即時急Call漢堡中場巴迪積頂上，不過佢要周五先至趕到巴西報到，今場唔使預佢，咁搞法「格仔軍」真係唔多樂觀，今場都係捧唔落等下場先啦！
Data King：6場分組賽得1勝

‧格仔軍喺02、06年世盃6場分組賽只得1勝。

‧克羅地亞13場決賽周賽事，取得6勝2和5負。

‧格仔軍近3次喺分組賽首戰錄得1勝2負。

‧克羅地亞大軍中只有前鋒奧歷、守將達里祖史拉喺決賽周入過波。
乜都玩錦囊：巴西火力勁撐「大」戰

單靠上年洲際盃5戰勁入9球嘅射手費特同尼馬，巴西火力已經有保證，咪忘記佢哋仲有兩閘齊飛嘅馬些路同丹尼爾，大把進攻板斧。克羅地亞冇咗前鋒文迪蘇傑，但仲有拿傑迪錫等好波之人，中堅洛夫雲亦擅長喺死球搵食。今場梗係追埋1.8倍入球大。