西班牙跌Watt讓唔起荷蘭

猪拉多纳

「小白」沙維老喇！

世界盃踏入第二日賽事，就上演超級重頭戲，由B組種子西班牙，同荷蘭合演上屆決賽翻版戰！堅正！雖然好多朋友都認為「橙軍」無復當年勇，但我對領隊尹戈爾嘅功力相當有信心，預期荷蘭今仗會先做好防守，然後再伺機反擊，衞冕冠軍西班牙鋒力大跌，未必咬得入佢哋，我撐受讓半一嘅荷蘭！（無綫翡翠台、明珠台及TVB13、now818台、中央5台周六凌晨3:00直播）

點解西班牙同巴塞隆拿之前咁好成績，好多人都有唔同嘅睇法，但我就覺得主要原因係中場沙維同恩尼斯達大爆發，喺中前場不斷策劃攻勢，有時為隊友鋪橋搭路，有時就自己發難搵食，令對手防不勝防。我踢波嘅時候係司職前鋒，好清楚知道中場踢得生猛，就無時無刻都可以為我製造攻門機會，我哋打前嘅會比較容易交到貨。
雙防中狂牛怕輸求穩

相反，假如中場冇料到，供應唔夠，就算我哋班前鋒幾有料都好，一條友都去唔到咁多段o架嘛，你估係超人咩，好難入到波o架！

呢個情況，上季嘅巴塞就完全反映晒出嚟喇，點解成績咁曳？美斯唔弗？尼馬冇料？統統唔係！我認為主因就係沙維同「小白」冇狀態，一旦佢兩個同時畀人盯死，就完全惡唔出樣！上年洲際國家盃決賽，西班牙點解會慘吞3蛋呀？咪因為佢兩個年事已高，無復當年勇囉。何況今日佢哋仲擺沙比阿朗素搭布斯基斯嘅雙防中，擺明係驚輸求穩啦。
「橙軍」踢反擊仲煞食

今晚西班牙面對荷蘭，沙維同恩尼斯達可能唔會齊齊踢正選，但就算是旦一個踢，再夾其他中場球員，面對「人型坦克」尼祖迪莊，好大機會冇運行，上屆世界盃佢踢沙比阿朗素嗰腳，已經嚇到班「鬥牛兵」騰騰震，最重要係荷蘭領隊尹戈爾排個陣超狠，冇咗雲達華治同史杜特文，就索性轉踢4231，防守力升呢，配合兩件弗嘅鋒將尹佩斯、洛賓，贏唔贏到好難講，但要保持不敗就應該唔難，博受讓半一嘅「橙軍」最明智。
Data King：荷蘭近屆例入淘汰賽

‧荷蘭對上2屆世盃決賽周6場分組賽，一共取得5勝1和。

‧橙軍歷嚟踢咗43場世盃決賽周賽事，錄得22勝10和11負，攻入71球，失44球。

‧荷蘭近5次打入世盃決賽周，未試過分組賽出局。

‧橙軍連續2屆世盃分組賽都係失1球。
Data King：斯文鬥牛兵少領紅

‧西班牙喺近2屆世盃決賽周6場分組賽，取得5勝1負成績。

‧鬥牛軍一共踢過56場世盃決賽周賽事，錄得28勝12和16負，攻入88球，失59球。

‧西班牙連續3屆世盃至少打入8強階段。

‧鬥牛兵喺歷嚟咁多屆世界盃決賽周，只係拎過1面紅牌咁大把。
乜都玩錦囊：橙軍穩守做細界

西班牙上屆世盃雖然奪冠，但7場賽事夾埋只係入得8球，同佢哋熱愛控球嘅穩打穩紮踢法大有關係，加上荷蘭今場事先張揚會用防守反擊戰術，希望出奇制勝，呢場波刺激就梗o架喇，但就唔使旨意多波入囉，1.54倍入球細幾熱都要捧！