波斯尼亞攻得有權突破F組

猪拉多纳

森巴熱浪，你感受到未？小弟好開心可以喺《太陽波經》繼續同大家一齊講波。世界盃決賽周開鑼後，啲名牌國家隊一連幾日陸續出場，佢哋當然係球迷傾波對象，不過小弟反行其道，今次特別留意一隊「新丁」，睇好波斯尼亞呢支東歐國家隊可以突破F組殺入16強。

每屆世界盃都梗有一啲「神奇球隊」畀到驚喜球迷，我估今年波斯尼亞好大機會係呢類。唔少球迷聽到波斯尼亞，就只會諗起佢哋係一個戰亂國家，不過其實當地足球發展得好快，唔少國腳依家都喺歐洲頂級聯賽搵食，最為人所熟悉嘅當然係曼城射手迪斯高，但查實佢哋仲有大把猛人。
穩劏伊朗 尼日利亞 敲迪斯高攞神射手

數人腳，波斯尼亞有迪斯高同伊比斯域兩個射得之人，中場又有踢羅馬嘅超新星比真歷，同埋喺德甲賀芬咸搵食嘅沙利荷域，而且仲有英超最佳門神之一嘅比高域把守最後一關，實力絕對高過同組嘅伊朗同尼日利亞。波斯尼亞主攻型踢法唔輸得畀阿根廷幾多，一個唔覺意畀佢哋攞埋小組首名都唔係奇事！玩小組首、次名不妨博吓冷，敲波斯尼亞攞F組首名、阿根廷次名出線啦！

除咗首次名之外，我估計迪斯高喺對伊朗同尼日利亞兩場波可以大開殺戒，冷敲買佢攞神射手亦係唔錯嘅選擇。

其他組別小弟都有唔少心水，尤其係幾隊南美洲二線分子，例如禮拜六朝早先至出場嘅智利就好令人期待。阿歷斯山齊士腳法同入球能力都係一流，如果佢唔係踢巴塞，球迷焦點去晒美斯、尼馬嗰度，或者已經係其中一個世界頂級巨星喇！