球會賽事頻密玩殘球星

猪拉多纳

四年一度世界盃，球迷們期待雲集全球最佳球員大比併，可惜開波前已經有唔少重量級球星因傷無緣獻技，令賽事失色唔少。最唔抵係馬高列奧斯、蒙杜利禾、列貝利及雲達華治等原本已入選大軍名單，卻臨尾傷退。亦有C朗、蘇亞雷斯、迪亞高哥斯達等帶傷入伍，難免影響發揮。大熱天時六月飛「傷」，必有冤情，歸根究柢係球會賽事太密，榨乾球員，季尾傷疲盡現。
Ｃ朗唔夠一年踢60場波

上述球星過去一季甚少受傷，但點解喺國家隊集訓，或者踢競爭程度低嘅熱身賽又突然變「玻璃腳」，一碰即碎？好大程度上因為過去一季搏得太盡。就以C朗為例，皇馬上季38場聯賽、13場歐聯、9場西班牙盃，C朗參與絕大部分賽事，唔好忘記仲有國際賽。換言之唔夠一年踢咗超過60場波。類似情況亦發生喺西班牙前鋒迪亞高哥斯達身上；蒙杜利禾、列貝利亦分別為AC及拜仁多線作戰搏到殘晒。

「世盃年」聯賽及盃賽濃縮賽程，球員負荷更大，特別係星級主將每場都要搏，唔夠時間休息，受傷機會自然高。球會以商業運作，機關算盡，即使對待球員亦榨到盡，否則點會畀咁高人工。捱到世界盃已經被榨乾榨淨，梗係腳軟啦。