烏拉圭超班做贏加

猪拉多纳

今屆世盃另一隊奪標熱門烏拉圭，將會喺今晚登場，喺死亡D組對住最弱嘅哥斯達黎加，足智彩個讓球盤開烏拉圭讓一球，小妹認為上盤可以坐走望贏，捧得過！

（無綫翡翠台、明珠台、TVB13及now818台、中央5台周日凌晨3:00直播）

詳述心水之前，容許小妹拋吓書包。烏拉圭係第一個世界盃主辦國，佢哋喺1930年同1950年兩屆分別搞掂阿根廷同巴西，捧起大力神盃，最得人驚嘅，係佢哋嘅國家人口只係得330萬，連香港一半都無，係人口最少嘅世界盃冠軍，都咪話唔犀利！

講完歷史，就講吓烏拉圭今屆嘅人腳啦！呢個南美洲國家雖然人少少，但仍然能夠盛產世界級球星，應季英超金靴得主兼英格蘭球員先生蘇亞雷斯、PSG神箭卡雲尼，轉戰日職嘅老牌Icon科蘭、馬體會孖寶高甸同基斯甸洛迪古斯等等……個個都咁堅！上屆南非世盃，烏拉圭殺到入4強，之後佢哋喺2011年仲捧埋美洲國家盃，實力夠晒保證！
唔敢盲撐哥斯達黎加鄉里

仲有一點，就係烏拉圭喺巴西有「主場優勢」！唔講唔知，原來喺烏拉圭23人大軍入面，有7個係「巴甲人」，其中3個依家喺巴甲搵食，4個曾經踢過巴甲，包括主力後衞盧根奴同前鋒科蘭等，所以盧根奴尋日受訪嗰陣，都話佢哋要適應當地環境唔係問題！

係，雖然烏拉圭王牌蘇亞雷斯前排傷咗半月板要做手術，但據聞佢嘅傷已經好得七七八八，今晚即使未必披甲，但烏拉圭都仲有兩件世界級射手卡雲尼同科蘭壓陣，防線又有馬體會守將高甸孭飛，攻守都咁可靠！

雖然識我嘅朋友，都知我家族同哥斯達黎加關係密切，自細我都當自己係半個哥斯達黎加人（家族中得我同哥哥唔識西班牙文 >_<）但足球比賽係好現實嘅，哥斯達黎加狀態唔掂，對上10場比賽得3勝2和5負失15球，尋日佢哋件守將希拿莫拉又因為練波嗰陣整親被迫退隊，要補選前費城聯後衞戴夫米利，大戰前突然變陣，點搞呀？
Data King：打過11屆決賽周

&#8231;烏拉圭曾11次打入世盃決賽周，2次奪得冠軍。（1930年、1950年）

&#8231;踢過47場決賽周賽事，錄得18勝12和17負，總共攻入76球，失65球。

&#8231;上屆世盃取得殿軍，同1970年一樣，不過到1974年世盃就分組賽出局。

&#8231;今屆南美洲世盃外圍賽，得失球一樣，都係25球。
Data King：兩屆分組賽僅1勝

&#8231;哥斯達黎加曾打入3次世盃決賽周，最勁嗰次入到16強。

&#8231;踢過10場決賽周賽事，錄得3勝1和6負，總共攻入12球，失21球。

&#8231;02、06年6場世盃分組賽，僅錄1勝1和4負。

&#8231;今屆中北美洲及加勒比海區世盃外圍賽攻入13球，少過榜首美國2球。
乜都玩錦囊：哥斯達黎加預咗大敗

烏拉圭主力射手蘇亞雷斯雖然好有可能缺陣，但孭飛嘅科蘭同卡雲尼絕對夠「卡士」，睇番被視為「魚腩」嘅哥斯達黎加防線超弱，對住火力唔算太強嘅日本都要失3粒，今場肯定慘遭「大」屠殺，2.12倍入球大抵捧。