日本獵象 平手有計

猪拉多纳

信東瀛統計學權威！不敗率65.4% 勝率45.6%

聽朝將會上演今屆世盃唯一一場「9點場」，由C組嘅科特迪瓦大戰日本！「大象國」科特迪瓦近屆大賽都冇乜作為，反觀「藍武士」近況頗佳，加上佢哋國內嘅「統計學第一人」鳥越規央博士更以科學方法計算過，發現日本今屆世盃首戰「不敗率」超過6成，勝率更加高於4成，平手盤當然捧1.97倍客勝啦！

（無綫翡翠台、明珠台、TVB13台、now818及中央5台周日早上9:00直播）

人稱「日本體育統計學第一人」、44歲嘅鳥越規央博士，自97年喺築波大學取得數學研究博士資格之後，就醉心研究體育統計學，近年仲頻頻寫專欄、出書同上電視解說，儼如「學術明星」，所以佢今次幫日本隊預測出線機會都相當受注目。
計賽績！出線率達56%

鳥越分析過上屆世盃結束後4年內，32支球隊嘅全部對賽往績，再根據統計學原理，計算出日本首戰嘅勝率達45.6%，和波機率則有19.8%，換言之今場不敗率有65.4%，成功搶分得手機會頗高；鳥越博士又指「藍武士」小組首名出線機會雖然得14%，但次名則有42%，即係話出線機率達到56%，相信班日本國腳聽完都會士氣大振啦！
耶耶托尼有傷未必踢

論星味，擁有托尼兄弟、杜奧巴、謝雲奴、韋菲特邦尼嘅科特迪瓦，實力毫無疑問比日本優勝，不過主將耶耶托尼有傷今場未必出得，「阿哥」高路托尼上月底感染嘅瘧疾雖然已經好番晒，但佢上季英超喺利物浦上陣唔多之餘，表現更加極度飄忽，難以令連續7場失波嘅科特迪瓦防線有起色。日本領隊沙哲朗尼一早命大軍「我自行我道」，即係集中用自己嘅方式踢好每場比賽、對勁旅亦無需膽怯，日本傳媒亦聲稱「藍武士」將用主守踢法迎擊科特迪瓦，如果可以把握反擊同死球機會，陣中擁有唔少技術型球員嘅日本，絕對有望全取3分o架！
Data King：外圍賽小組入球王

‧科特迪瓦曾2次打入世盃決賽周，不過均於分組賽出局。

‧踢過6場決賽周賽事，錄得2勝1和3負，總共攻入9球，失9球。

‧今屆世盃外圍賽非洲區C組攻入15球，是小組之冠。

‧歷來兩軍對戰3次，勝負和各1場，上次交手科特迪瓦以2:0勝出。
Data King：最叻入過16強

‧日本曾打入4屆世盃決賽周，最佳成績為16強。

‧踢過14場決賽周賽事，錄得4勝3和7負，總共攻入12球，失16球。

‧近2屆世盃決賽周6場分組賽，錄得2勝1和3負。

‧今屆世盃外圍賽亞洲區B組入16球，是小組之冠。
乜都玩錦囊：有前冇後開大片

踢法體力化嘅科特迪瓦，同講求技術與速度嘅日本風格雖然截然不同，但雙方同樣畀人一種「有前冇後」嘅感覺，尤其日本近5場全勝兼有4場最少入3粒，後防亦有3場失兩粒或以上，遇上防守同樣「吔吔烏」嘅科特迪瓦，2.45倍入球大值捧。