阿古路 迪斯高:我要做主角

猪拉多纳

活在陰影下 受夠啦！

有時個天就係咁唔公平，無論你有幾勁，都可能永遠只能做「阿二」，活喺人哋陰影下，阿根廷嘅阿古路有射術、有腳法，但「阿國球王」之位永遠都由美斯獨霸；而阿古路嘅曼城隊友迪斯高仲慘！喺波斯尼亞佢無疑係頭號射手，但返到球會就只能屈居阿古路之後做後備，聽朝F組阿根廷對波斯尼亞，呢兩位頂級射手將展開明爭暗鬥，誓要做番次主角！
球王美斯 閃耀登場

提起阿根廷，係人第一時間都只會諗起美斯，覺得佢點都要攞1次世界盃先可以證明到自己係真正球王，而且喺名牌效應下，美斯更被視為世盃神射手熱門，阿根廷陣中幾位高質素前鋒如阿古路、希古恩等，好似只係美斯嘅陪襯品。
力圖超越沙煲兄弟

當然，唔係話美斯名大於實，而係希望大家喺關注美斯嘅同時，亦會知道阿國仲有好多頂級射手，尤其係阿古路。呢位26歲前鋒曾經以15歲35日之齡成為阿甲史上最年輕嘅上陣球員，打破球王馬納當拿紀錄。阿古路無論喺母會獨立隊、馬體會定曼城，都保持住超高入球率，上季英超佢雖然經常受傷，踢咗23場聯賽仍然能夠取得17個入球，當中更係一個12碼都冇，可見其射術及把握力都非常驚人。

阿古路同美斯稱兄道弟，二人成日話要轉會，跟對方踢埋同一隊，佢哋更係好「機友」，據知10年世盃外圍賽期間，同處一室嘅阿古路同美斯經常通宵達旦玩Winning eleven。嚟到今屆世盃，兩兄弟繼續孖鋪，美斯放棄住總統套房而選擇同阿古路同房，真係friend過打band！不過，即使佢哋有幾friend，相信成日活喺美斯「光環」下嘅阿古路都想有一日會超越美斯，因為冇人想長期做「阿二」，即使對方係沙煲兄弟，都會想過要超越對方。
唔甘心長做後備王

當阿古路追逐美斯嘅時候，佢身後亦有個迪斯高以佢為目標。波斯尼亞籍嘅迪斯高喺11年1月加盟曼城，同年7月多咗阿古路呢位隊友，結果迪斯高被貶為後備，從而得到「後備王」稱號，因為呢位28歲前鋒同樣有好高嘅入球率，而且每次後備出場都交足貨，經常幫曼城射入關鍵入球，今季成為曼城奪得英超嘅功臣，但立大功又點先？當阿古路冇病冇痛嘅時候，佢又要坐番喺後備席，認真悲情。

今場波無論係為國家定為自己，迪斯高同阿古路將會展開一場暗戰，互鬥射術，誓要喺世盃呢個大舞台做番次主角﹗

（TVB13、now818及840周一早上6時直播）
大戰數讀

1:波斯尼亞全名係波斯尼亞黑塞哥維拿，曾經係前南斯拉夫嘅一部分，自92年獨立後，今屆終於第1次進身世界盃決賽周。

5:阿根廷自90年以衞冕身份首戰輸畀喀麥隆後，近5屆首輪分組賽都能夠順利贏波，其中3次都係小勝1比0，包括上屆擊敗尼日利亞。

15:阿根廷此前15次出戰世界盃決賽周，分別於1978及1986年兩奪冠軍。

28:阿根廷係決賽周32強中嘅「最老」球隊，平均年齡達到28歲零11個月，喺巴西炎熱天氣下作賽，似乎有啲蝕底。

35:曼城射手迪斯高係波斯尼亞史上最多入波嘅球員，上陣62場共入轟35球。

38:美斯至今86次為阿根廷上陣，總共攻入38球，比史上首席射手巴迪斯圖達少18球，位居第2位。

82:波斯尼亞陣中國際賽經驗最豐富嘅係効力中超貴州人和嘅副隊長米斯莫域，共擁有82頂喼帽，仲多過正隊長史柏希斯嘅74頂。