法國排洪冇手軟

猪拉多纳

「新巴神」保羅普巴夠料領軍

E組首輪分組賽，法國於阿萊格里港河岸球場鬥洪都拉斯。法國上場熱身賽大炒另一支中北美洲球隊牙買加8比0，唔止為今仗壯聲威，同時向球迷證明冇咗列貝利唔係世界末日。洪都拉斯防守雖然有番咁上下，奈何攻力一般反撲乏力，一心死守相信輸波只係時間問題，法國讓一球、球半照捧上盤。

（無綫翡翠台、明珠台、TVB13及19、now 818及840周一凌晨3時直播）

法國中場列貝利因傷無緣出戰決賽周，無疑令唔少球迷非常失望，不過對領隊迪甘斯嚟講，其實一早已經適應缺少列貝利嘅進攻體系。法國喺今年踢咗四場熱身賽取得三勝一和，列貝利全部冇份落場，取而代之係上波更快、進攻更具效率嘅「新巴神」保羅普巴、馬度迪、基沙文等新貴，甚至上場搵賓施馬墮後打左中場，配合基奧特攻堅亦取得理想效果，上場能夠大勝同樣來自中北美洲嘅牙買加，對球員今仗嘅爭勝信心肯定起到刺激作用。
洪都拉斯捱打格

洪都拉斯對上兩次參加決賽周都係首圈出局，而且上屆三場分組賽一球都入唔到，擺明係陪跑分子，佢哋自知實力有限，無論面對任何球隊都係主守為先，唔會胡亂進攻，不過正所謂久守必失，一支冇反擊能力嘅球隊全場死守絕非上策，而且一旦被打破缺口，便有可能陷入進退失據嘅局面，睇番佢哋上屆分組賽面對西班牙亦係淨輸兩粒，今次再輸有咩咁出奇！法國為免日後有機會要以得失球差決定出線權，面對被視為此組最弱嘅洪都拉斯贏一粒唔夠數，法國讓一球、球半撐上盤。

特別項目方面，法國前鋒賓施馬上場熱身賽對牙買加梅開二度兼有一球助攻，狀態托弗，今仗先發事件可以捧佢「入球」。
MARK實佢：洪都拉斯中場 羅渣艾斯賓路沙

雖已隨韋根降落英冠比賽，不過羅渣艾斯賓路沙喺國家隊嘅位置依然牢不可動。艾斯賓路沙擅於在左路發難，擁有充沛體力，無論進攻、防守都係不可或缺嘅重要棋子。
MARK實佢：法國中場 保羅普巴

有「新巴神」之稱，被譽為現時歐洲球壇潛質最優厚嘅新一代中場，雖然佢已幫祖雲達斯贏過兩次聯賽冠軍，上年亦幫法國贏得世青盃冠軍，不過喺大國腳層面仲未有咩代表作，今次世盃係真正考驗佢嘅好機會。
世盃遇中北美球隊 法國冇甜頭

雙方從未碰過頭，不過法國以往於世盃決賽周，曾五次與同屬中北美洲球隊如墨西哥及加拿大交過手，雖然取得三勝一和一負稍佔上風，但其實除咗首屆世盃以4比1大勝墨西哥外，其餘勝仗都係贏一粒僅熟，包括86年世盃首仗以1比0險勝弱旅加拿大，唔係想像中贏得咁容易。

巴西名哨畀牌「老烏」

國籍：巴西　　

年齡：39

曾執法大賽：13世青盃、13世冠盃

簡介：雷斯是東道主巴西首屈一指的名哨，場外為政府部門工作，精通葡語、英語、西班牙文及意大利文。雷斯上年於世冠盃決賽執法，表現不俗。然而，雷斯於2011年一場賽事，試過向同一名球員兩度出示面黃牌，但忘記以紅牌驅趕該球員離場，相當大懵。

執法場數：38

黃牌數：173

紅牌數：17

平均紅牌數：0.45

判12碼：11

平均黃牌數：4.55

平均判12碼次數：0.29
笛子波童推介：法國（上盤）