瑞士正氣冇厄你

猪拉多纳

希斯菲特領軍不敗率85%

今晚世盃頭場上演E組首輪分組賽，瑞士於巴西利亞市國家球場鬥厄瓜多爾。瑞士近年成為歐洲新興勢力，在德國名帥希斯菲特帶領下，瑞士於最近3年內嘅28場國際賽僅輸4場，不敗率逾8成，厄瓜多爾離開高原主場冇料到，平手盤波童捧瑞士。

（無綫翡翠台、明珠台、TVB 13、及19、now 818及840周一凌晨零時直播）

今次係瑞士連續第三屆打入世盃決賽周，上屆首戰佢哋一鳴驚人，爆冷以1比0擊敗後來贏得冠軍嘅西班牙，雖然最終未能出線，但已經充分證明呢班波嘅潛力深不見底。由2011年6月起計，佢哋至今一共踢咗28場國際賽，取得17勝7和4負，不敗率達八成五，當中包括於今屆歐洲區外圍賽以10戰不敗成績取得小組首名出線，夠晒正氣，而且佢哋現時世界排名第六，僅次西班牙、德國、葡萄牙於歐洲區排行第四，表現獲廣泛認同。

瑞士現時大部分主力皆來自意甲及德甲球會，包括拿玻里中場孖寶恩拿及比哈美、祖雲達斯右閘列治史迪拿、慕遜加柏中場格列沙加、紐倫堡前鋒祖斯比迪米斯等等，大戰經驗唔需要懷疑，另外，梳頓沙基利雖然於拜仁長居後備，但返回國家隊卻常有亮麗演出，表現好壞對爭勝起着關鍵作用。
厄瓜多爾離開高原唔識贏

厄瓜多爾於今屆外圍賽以南美洲區第四名資格直接出線，如果唔係東道主巴西唔使踢外圍賽，厄瓜多爾未必可以輕鬆打入決賽周，而且佢哋攞到好成績，某程度上同擁有高原主場地利有直接關係，佢哋外圍賽七場勝利全部於主場取得，一旦離開自己地頭，八場作客三和五負未贏過，雖然佢哋近期熱身賽先後打和荷蘭、英格蘭等勁旅，但講到個人質素，陣中只有曼聯翼鋒路爾斯華倫西亞稍具名氣，其他球員少見大場面，經驗輸一截，平手盤捧瑞士應可坐和望贏。

其他投X推介，瑞士側擊力強，厄瓜多爾陣中亦有翼鋒路爾斯華倫西亞，捧角球大。
MARK實佢：厄瓜多爾前鋒 卡些度

唔講唔知，卡些度踏足歐洲球壇加盟嘅首支球隊就係瑞士巴素利，對瑞士足球有一定認識，而且佢亦踢過英超曼城，射術有番咁上下，佢喺今屆外圍賽攻入7球，係隊中首席射手。
MARK實佢：瑞士中場 恩拿

瑞士今屆大軍名單中有3人來自意甲拿玻里，其中隊長恩拿地位最重要。恩拿踢法剛柔兼備，亦係球隊轉守為攻嘅中場樞紐，其遠射炮隨時亦可殺對手一個措手不及。

伊馬杜夫Ravshan Irmatov

國籍：烏茲別克

年齡：36

曾執法主要大賽：08、11世冠盃、10世界盃、11亞洲盃

伊馬杜夫阿爸同樣係球證，佢喺08至11年連續4年當選亞洲最佳球證，4年前執法南非世盃揭幕戰，以32歲之齡成為34年來最年輕嘅揭幕戰判官。不過，佢喺上年洲際國家盃分組賽意大利對巴西一戰犯下低級錯誤，認為巴西犯規指住12碼點，但見意軍守將基亞連尼抽入後轉身畀得益判入波，判決惹人質疑。

執法場數：114

黃牌數：294

紅牌數：26

判12碼：14

平均黃牌：3.46

平均紅牌數：0.23

平均判12碼次數：0.12
笛子波童推介：瑞士 平手盤