荷蘭贏鬥心 咪過分樂觀

猪拉多纳

荷蘭大勝西班牙，證明比賽鬥志及決心往往先至係勝負最關鍵因素，「橙衣兵團」上屆決賽同冠軍擦身而過，今場你可以話佢哋要報仇，或者要爭番一啖氣，總之表現遠比對手積極，正係呢股無比鬥心，創造驚人賽果。不過，比賽係逐場計，基於上述特殊背景，激發荷蘭小宇宙，但唔代表實力班超，fans不宜過分樂觀。
西班牙唔太擔心出線

荷蘭完美報仇，「橙迷」固然歡喜若狂，但最值得欣慰係尹佩斯沉咗一季後，重拾射手本色，半場尾段為球隊扳平，呢球非常重要，激發全隊士氣同信心，令換邊後佔一面倒優勢，可以話全場最佳球員。當然洛賓演出亦盡顯「卡士」，速度令對手食塵，呢對黃金拍檔威力無容置疑，領隊尹戈爾要令球隊保持銳氣，屬於現時最重要工作。

至於被指為輸波罪人嘅西班牙門將卡斯拿斯，連番出錯，相信同佢近兩季失去皇馬正選有關，導致信心受動搖。依家好睇領隊迪保斯基同隊友撐唔撐佢，如果內部夠團結，卡斯拿斯應該可以捱過難關，否則餘下賽事，準備坐冷板。雖然西班牙控球踢法，已被列強洞悉，但應付低一班球隊，仍然綽綽有餘，唔需要太擔心出線問題。

另外，墨西哥同智利都贏得有說服力，前者圍波、上波方面做得好，大大削弱喀麥隆前鋒殺傷力。至於智利級數凌駕澳洲，除咗有少部分時間輕敵，出現混亂外，基本上完全食住對手。