保養聲帶各師各法

猪拉多纳

齋啡溝水 靚蜂蜜Ready

每次做大型比賽例如奧運會同世界盃，感覺上就好似去參加一場馬拉松比賽，事前一定要做足準備工夫，講嘅唔單止係資料方面，更加重要係個人精神、體力同意志力，事關日以繼夜、夜以繼日，十足十拉布，少咗邊一瓣隨時都會剪布！

講波佬把口冇時停只係限於做節目嘅時候！呢排Peter為咗養住把聲，做咗沈默的羔羊，冇乜必要都廢事亂噴口水，平時佢人未到聲先到，家陣就唔同晒，坐喺錄影廠裏面如果唔係做節目，佢同人傾兩句後就話：「唔好意思傾住咁多先，要畀條聲帶抖下！」其實大家都有唔同保養把聲嘅方法，Peter習慣三分之一杯齋啡溝滾水就係咁簡單，大家唔好問點解，反正各師各法。

我就好正路，屋企人幫手準備咗頂級靚蜂蜜，十足潤滑油一樣咁正！食嗰方面就避開晒啲煎炸同生冷食物，廢事熱氣同肚屙！講真想Keep住十足狀態講每一場波，最重要係一有空檔，無論係瞓番一兩個鐘頭充電，定係十五分鐘閉目養神都冇得錯過！
齊腳講波有今生冇來世

好似尋晚到今朝連續4場波，計埋比賽前瞻同賽後總結，每場賽事出街時間三粒鐘，計計埋埋足12個鐘頭，仲有早、午、晚黃金戰報，希望球迷們感受到我同Peter對世界盃嘅全情投入！順帶一提，今朝科特迪瓦對日本嘅講波陣容有Peter、我同何輝，喺ESPN時代都未曾一齊合作過，套用Peter金句：有今生、冇來世！