美斯反擊戰 搏命入波

猪拉多纳

阿根廷球王？仲爭1隻世盃！

世盃開始咗幾日，係咪睇得好過癮呢？今晚輪到另一支奪標熱門、F組嘅阿根廷登場，首戰硬撼同組實力強橫嘅波斯尼亞，肯定好睇過戲！美斯贏盡各大獎項，就只差一個世界盃去證明自己，今晚一定去到盡，勢要為國家隊打響頭炮！阿根廷讓1/1.5球，捧上盤啦！

（TVB13及now818台、中央5台周一早上6:00直播）

阿根廷曾經兩奪世盃，舉行地點都係南美洲，所以今屆巴西世盃，阿根廷絕對稱得上有半個「主場」之利。對上兩屆，佢哋喺分組賽表現都十分之好，斷估今屆唔會突然走樣啩！尤其係阿根廷隊長美斯，佢喺球會贏得唔少榮譽，但一返到國家隊就成日畀人插「隱形」，又話佢冇咗沙維同恩尼斯達交靚波，就好似唔識踢波咁，啲說話真係要幾難聽有幾難聽！
OL沙貝拉變陣 搵3星「幫」美斯

大家都係司職前鋒，我都曾經受過唔少冷言冷語，好明白畀人批評嘅感受，亦知道要令批評聲音停止嘅方法就只有一個，就係搏老命入波！美斯點會唔明呢個道理吖，佢亦知道自己只係差一隻世界盃，就可以證明自己係名副其實嘅球王，阿根廷領隊沙貝拉都知道，要「激活」美斯，就要改變戰術！依家嘅阿根廷攻擊線，除咗美斯，仲有阿古路、希古恩及迪馬利亞攻堅，絕對可以化身「阿根廷版」嘅沙維同「小白」，幫美斯開路，雖然希古恩有傷未必出得，但我認為代替品拿維斯一樣唔嘢小。

波斯尼亞人腳質素參差

對家波斯尼亞首次參賽，經驗輸蝕唔在講，之前佢哋喺國際賽已經同阿根廷交過手兩次，兩次都係輸波收場。雖然波斯尼亞有迪斯高孭飛，但中後場人腳就認真不敢恭維，有部分仲要係喺匈牙利、中超、德乙、克羅地亞等聯賽落班，點頂得住星光熠熠嘅阿根廷呀？
Data King：阿根廷分組賽6戰5勝

‧阿根廷曾15次打入世盃決賽周，並奪得2次冠軍，已連續第11次打入決賽周。

‧踢過69場決賽周賽事，錄得37勝14和20負，總共攻入123球，失80球。

‧近2屆世盃決賽周6場分組賽，錄得5勝1和成績。

‧今屆世盃外圍賽南美洲區攻入35球，成為小組之冠。
Data King：波斯尼亞齋靠迪斯高

‧今次係波斯尼亞歷史性第一次進身世界盃決賽周。

‧今屆世盃外圍賽歐洲區攻入30球，只失6球，成為小組之冠。

‧曾兩對阿根廷，冇入波之餘仲失咗7球。

‧射手迪斯高喺世盃外圍賽有10球進帳，佔成隊波總入球嘅3分1。
乜都玩錦囊：波斯尼亞踢守細波

波斯尼亞領隊蘇錫，早前已講明對阿根廷唔會主攻，好有可能轉踢穩守突擊戰術。如果阿根廷用唔到中路突入，或者會用兩邊出波，高空攻勢未必恰到牛高馬大嘅波斯尼亞防線，入球中位數2.5球，博埋個2.02倍入球細。