美加精華遊續獻入球騷

猪拉多纳

森巴狂熱 鼓動進攻

世盃分組賽G組首輪加納於納塔爾杜納斯球場出戰美國，加納往績同平均人腳都勝美國一籌，平手盤原本應該睇高一線，不過考慮到非洲球隊演出一向反覆，美國又有加零一鬥心，基於同組有德國同葡萄牙兩強，今場對雙方嚟講都係生死戰，只有贏波至可以指望爭出線，黑柴博2.35倍大盤。

（TVB13及19、now818及840周二早上6時直播）
佩服郭家明 慧眼識大波

黑柴不得不佩服偶像郭家明，當絕大部分專家認為，今屆賽事喺酷熱天氣下進行，入球唔會多嘅時候，郭指導早喺月初接受本報訪問時，已經指明巴西嘅足球狂熱遠非上屆南非可比，呢度嘅球迷會推動落場球員去進攻同爭取入球，估計會有好多波入，結果證明郭指導獨具慧眼，至截稿時，今屆決賽周總共踢咗8場分組賽，當中7場開出大盤，唔好忘記唯一開細嘅墨西哥對喀麥隆賽果雖然係1比0，但墨西哥早於上半場已有兩個合法入球畀球證誤判詐胡，否則極可能係全大添！
同組對手強 雙方焗攻求勝

今晚兩軍賽前目標一致，就係贏出今仗後，再同葡萄牙爭次名出線資格，今場贏唔到就乜都唔使諗，所以雙方都會盡一切努力去搶攻，今次係加納連續三屆踢決賽周，之前連續兩屆殺敗美國，亦連續兩屆殺入淘汰賽，今屆最後熱身賽大炒南韓4蛋證明攻力相當，新星佐敦阿休爆發顯然比養傷嘅華維斯更有威力，配合基恩同阿休喺前線，要攻陷級數有限嘅美國防線難度唔高。

美國領隊奇連士文放棄國家英雄當路雲令舉國嘩然，不過奇帥係用心良苦，皆因當路雲於過去一季喺美職表現，體能同速度明顯下滑，奇帥唔想大家就佢而拖慢節奏，寧願畀機會更年輕更有效率嘅球員，球隊前線丹普西級數高，加上射手艾迪杜里喺最後熱身對尼日利亞梅開二度重拾射門鞋，明早對加納唔會滿足於一分，入球大有好賠率博得過。
MARK實佢：加納前鋒 佐敦阿休

現年22歲，同兄長阿休一齊効力法甲馬賽，亦一齊入選國家隊，但佢喺球會被外借索察，喺國家隊任後備，好在最後一場熱身賽對南韓入替受傷嘅華維斯，連中三元奠定正選。
MARK實佢：美國隊長 丹普西

喺當路雲落選後，丹普西順理成章升格為美國隊長同大阿哥，呢位曾於英超打滾多年嘅中前場攻擊手，已為國家隊攻入37個入球，而且近期喺熱身賽表現相當出色。
加納連續兩屆恰美國

兩軍只在過去兩屆世盃決賽周碰過頭，都係加納贏，前屆世盃加納分組賽擊敗美國晉級，上屆兩軍於16強相遇，法定時間踢成1比1，戰至加時加納再下一城獲勝，晉級8強。
疊水球證好難收買

國籍：瑞典　　

年齡：40

曾執法大賽：歐聯、歐霸盃、歐超盃，12歐國盃

簡介：艾歷臣投資有道，兩年前出售瑞典一間媒體15%股份後成為富豪，不過金錢並無改變其生活，亦沒退休打算，仍擔任最喜愛的球證工作，艾歷臣有米又清高，不會被收買。

執法場數：89

黃牌數：321

紅牌數：16

平均紅牌數：0.18

判12碼：16

平均黃牌數：3.16

平均判12碼次數：0.18
蘇斯黑柴推介：大