睇世盃等同撐英格蘭？

猪拉多纳

雖然斯維一直有「香港好多英格蘭粉絲」嘅認知，但一直都冇乜特別大感受，尤其喺自己實際生活體驗上，直至尋日英格蘭對意大利大戰，先意識到「三獅兵團」嘅威力。喺本人生活圈子中，無論係已婚師奶、同學抑或屋企人，呢班可以話唔睇開波嘅「忽然球迷」，雖然知道「萬人迷」碧咸、奧雲等球星已經退役，但都不約而同為英格蘭校定鬧鐘爬起身睇波，其中有位同學仲話：「世界盃四年一度點都要湊吓熱鬧，我就畀吓面支持英格蘭喇。」斯維腦海中即刻彈咗一句「睇世盃＝撐英格蘭」嘅定調。
茶餐廳老闆唔想英軍出局

因此斯維決定去茶餐廳睇「英意大戰」，順便湊吓熱鬧，唔係同人邊有話題，雖然茶餐廳嘅世盃熱潮今不如昔，但睇見在場有老有嫩，個個叫個早餐Ａ或Ｂ，齊齊食住通粉又嗌又笑，當然粗口橫飛唔少得，令好耐冇出街睇波嘅斯維，重拾呢種平民睇波氣氛，老闆都話開咗波幾日，最好生意都係呢一刻，睇嚟佢都唔想「三獅兵團」咁快出局。

其實中國都試過02年首次殺入世盃決賽周，可惜本港球迷對國家隊嘅支持同熱愛，難同「三獅兵團」相提並論，呢種殖民地情意結，實在難以解釋。