C朗奧斯爾擘面？一晚咁多啦！

猪拉多纳

兩大男神決鬥 勁到「冇朋友」

「葡德玩家」今晚搶先為你辣慶個場，葡萄牙男神基斯坦奴朗拿度同德國型仔奧斯爾雖來自不同國度，但擁有兄弟般影子，場內踢出優雅足球，曾合作將勁敵大門一一摧毀。場外扮型Chok爆各大派對，攻陷無數美女芳心。兩人惺惺相惜，屬於天生完美拍檔，今場呢場德國大戰葡萄牙各為其主，大家識英雄重英雄，誓要來一場痛快嘅男人浪漫決鬥。
艦隊歲月 成完美拍檔

C朗出生於大西洋馬德拉島，同擁有土耳其血統嘅奧斯爾，一西一東天各一方，無論信奉嘅宗教、講嘅語言、周遭生活環境都有天壤之別，可以話係兩個唔同世界嘅人。不過文化差異並冇分割大家對足球嘅信念，同樣熱愛控球在腳，踢出華麗激情足球。唯一唔同係C朗較渴望射門入波，奧斯爾更喜歡為隊友製造機會，4年前命運安排兩人喺皇馬相遇，組成球壇「蝙蝠俠與羅賓」，球場上合作絲絲入扣，甚至可用心靈相通嚟形容。

兩人併肩作戰咗3年，奧斯爾27次妙傳畀C朗入波，成為後者職業生涯嘅「助攻王」。上季皇馬為集資天價收購加里夫巴利，而賣走奧斯爾，令C朗非常不滿，公開話：「奧斯爾係皇馬史上最佳10號，只有佢先至最了解我嘅走位，聽到佢離隊消息，我感覺好差。」有傳C朗仲因此而嬲咗球會管理層添！

雖然兩兄弟相隔兩地，但仍互勉互勵，C朗獲得國際足協金球獎時，奧斯爾立即恭賀佢，兩人亦於球場各自努力顯功架，C朗率領皇馬重奪歐聯冠軍，而奧斯爾亦助阿仙奴捧走足總盃，打破球隊9年錦標荒，成就互相輝映。球場以外，二人感情生活同樣多姿多彩，C朗同伊蓮娜係球場金童玉女，人氣爆燈。奧斯爾同歌星女友Mandy Capristo亦不時於社交網大晒恩愛，十足一對神仙眷侶。

柏林展蠟像 印證情誼

大戰前夕，德國柏林勃蘭登堡門前特別展出兩人蠟像，正凸顯佢哋嘅重要地位及深厚友誼。今仗相遇更關乎國家榮辱，戰情勢必劇烈，或會有一方失利。不過男人世界，勝負恩怨只會留喺球場，相信無論出現任何賽果，亦無損雙方友情，大家最想踢場好波，迎接最強挑戰！

（無綫翡翠台及明珠台、TVB 13及19、now 818及840周二凌晨零時直播）
大戰數讀

3:兩軍對上3屆都有參與世盃決賽周，但雙方嘅首輪分組賽總入球數字卻出現懸殊情況。德國近3屆首戰一共和對手炮製18個入球，以中位數2.5計全部開大；至於葡萄牙3場首輪分組賽只入6球，其中近兩屆均開細（06年1比0勝安哥拉、10年0比0和科特迪瓦）。

5:自94年一屆開始以德國名義參賽，德國連續5屆決賽周分組賽都以小組首名出線，當中有4次都能保持不敗身，唯一一次輸波是於上屆南非決賽周次輪0比1不敵塞爾維亞，其餘14場分組賽共錄得11勝3和。

14:高路斯喺對上3屆世盃決賽周一共為德國射入14球（02年5球、06年5球、10年4球），只要再入多1球便可追平前巴西國腳朗拿度保持嘅歷來世盃決賽周最多入球紀錄（15球）。另外，高路斯喺呢3屆德國首場比賽都有士哥，分別於02年8比0大炒沙特阿拉伯入3球，06年4比2勝哥斯達黎加入2球，上屆4比0勝澳洲則入1球。

49:基斯坦奴朗拿度代表葡萄牙國家隊上陣111次，射入49球，係國家隊史上入波最多嘅球員，佢同費高保持嘅國家隊上陣次數最多紀錄（127次）亦只係差16場，不過C朗喺對上兩屆世盃決賽周都表現一般，06及10年兩屆都只係入得1球咁大把。

99:德國係決賽周上陣次數最多嘅球隊，之前19屆決賽周參戰17屆共亮相99場，比踢足19屆嘅巴西仲要多兩場，今仗對葡萄牙將會係日耳曼兵團第100場決賽周賽事。

150:今屆德國陣中共有4名球員擁有過百頂喼帽，分別係隊長拿姆（106次）、舒韋恩史迪加（102次）、普多斯基（114次）同高路斯（132次），另外後衞梅迪薩卡亦已上陣98次，幾乎肯定可以喺決賽周破百。不過，代表德國次數最多嘅紀錄，仍然係5朝元老馬圖斯（左圖）所保持嘅150次。

1.86:德國係今屆32支參賽隊伍中平均身高最高嘅球隊，平均身高達1.86米。德甲拜仁慕尼黑和英超車路士則為最多球員參與決賽周嘅球會，各自有15名球員亮相今屆決賽周。

6:葡萄牙喺過往18屆世界盃，只係入過6次決賽周咁大把，但就已經攞過1次季軍（1966）同1次殿軍（2006），成績認真唔錯，唔知今屆有冇機會作出突破，打到入決賽呢？