比利時似係虛張聲細

猪拉多纳

英超二隊真係咁犀「利」？

今晚世盃H組賽事，被視為今屆爭標奇兵嘅比利時終於登場，呢班波畀人捧到上天，係咪真係咁堅？我就暫時有啲保留喇。事關「歐洲紅魔」好多球星都喺英超搵食，英超水準係咪想像中咁高先？歐聯戰績、英格蘭國家隊有辦你睇，今晚佢哋硬撼非洲代表阿爾及利亞，我就覺得捧1.92倍入球細，好過跟風捧比利時喇。

（無綫翡翠台、明珠台、TVB13及now818台、中央5台周三凌晨0:00直播）
勁旅盤口讓1/1.5太辣

比利時大軍名單出爐後，就不斷畀人吹捧，「歐洲紅魔」由當初嘅爆冷分子，依家竟然變成奪標熱門之一？太誇張喇！比利時依家嘅盤口，根本係當一級勁旅咁嚟開，就以今晚為例，佢哋面對世界排名22嘅阿爾及利亞，要讓到1/1.5球咁辣，但事實上呢班波嘅實力，係咪真係同盤口相符呢？

睇番佢哋個大軍名單，大門由泰拔高圖爾斯鎮守，中堅又有高柏尼搭華美倫，中場仲誇張，夏薩特、費蘭尼、贊奴沙、迪比利……鋒線又有盧卡古同米拿拉斯，的確好易畀人假象，以為呢班波夾埋一齊就好勁。不過大家要留意上述嘅球星，大部分都係嚟自英超，英超係咪歐洲最Top聯賽？歐聯4強得1隊車仔，英格蘭國家隊首戰踢到6、70分鐘就冇晒氣，大家仲覺得英超球星就係有料保證？唔係啩！
阿爾及利亞中後場硬淨

最重要係睇埋比利時大軍，包括少帥韋莫斯在內，根本冇人參與過國際大賽，一支零經驗、由英超兵組成嘅「英格蘭二隊」，未必咁易炒得起對手。

況且，對家阿爾及利亞亦唔係「魚腩」，尤其係中後場相當硬淨，近4場國際賽只失2球，拿玻里守將高林、利禾奴中堅美斯巴都有啲料到，中場又有華倫西亞10號仔菲侯利鎮住，只要佢哋踢番最擅長嘅穩守突擊，以非洲球員用唔完嘅體力，比利時未必W硬，我認為「紅魔」最叻都係好似上場熱身賽對突尼西亞咁，臨完場先咬到對手1粒，既然係咁，1.84倍下盤有機會執得半格，捧1.92倍入球細就係最佳選擇喇！
Data King：2屆分組賽6戰5和

‧比利時曾11次打入決賽周，最佳成績為殿軍，今屆為02年世盃後再次打入決賽周。

‧踢過35場決賽周賽事，取得10勝10和15負，攻入50球，失55球。

‧近2屆決賽周6場分組賽，只得1勝5和成績。

‧今屆世盃外圍賽歐洲區A組攻入18球，與同組塞爾維亞成小組入球之冠。
Data King：3戰決賽周未曾入16強

‧阿爾及利亞曾3次打入決賽周，皆喺分組賽出局。

‧踢過9場決賽周賽事，錄得2勝2和5負，總共攻入6球，失12球。

‧近2屆決賽周6場分組賽，只得2和4負成績。

‧今屆外圍賽非洲區攻入13球，只失4球，成為小組之冠。
乜都玩錦囊：紅魔唔怯場博讓主

雖然「歐洲紅魔」比利時除咗中堅雲拜頓外，其餘都係第一次踢世盃，但一班球員大多効力國內外大球會，首戰對阿爾及利亞相信唔會怯場，粒粒皆星嘅陣容有力輕取對手，2.22倍「讓主」抵玩。